ئەمریکا گیرانی بە بێ تاوانیی مەرزیە هاشمی پشتڕاستکردەوە
دادگەی واشنگتۆن رۆژی هەینی پشتڕاستی کردەوە مەڕزیە هاشمی پێشکەشکاری کەناڵی پرێس تی ڤی ، بە بێ تاوان و تەنیا وەک " شایەتحاڵێکی سەرەکی " لە دۆسیەکی نادیاردا گیراوە .
بەپێی راپۆرتی هەواڵدەری فارس ، بەپێی بەڵگەنامەکانی ئەم دادگایە کە بە فەرمانی بێریل هاوێڵ دادوەری دادگەی ناوچەیی ئەمریکا لە واشنگتۆن بڵاوبووەوە ، خانم هاشمی هیچ تاوانێکی ئەنجام نەداوە .
کاربەدەستانی ئەمریکی رایانگەیاند ، مەرزیە هاشمی کە تا ئێستا دوو جار بۆ شایەتی دان لە دادگەی ناوچەیی واشنگتۆندا ئامادە بووە دوای تۆکمەبوونی شایەتیەکە ، ئازاد دەکرێ . سەرباری ئەوە هێشتا هیچ کاتێک بۆ ئازادکرانی پێشکەشکارەکەی پرێس تی ڤی رانەگێندراوە .
مەرزیە هاشمی پێشکەشکار ، پەیامنێر ، داکیۆمێنتساز و بێژەری بەرەچەڵەک ئەمریکیی کەناڵی پرێس تی ڤی رۆژی یەکشەممە بێ هیچ بەڵگەیەک لە فڕۆکەخانەی سەنت لووئیسی ئەم وڵاتە گیرا و راپێچی گرتووخانەی پۆلیسی فێدڕاڵی ئەمریکا لە واشنگتۆن کرا .
مەرزیە هاشمی بۆ سەردانی بنەماڵەکەی سەردانی ئەمریکای کردبوو .
