نێچروان بارزانی لە چاوپێکەوتن لەگەڵ سەرۆک وەزیرانی ئیتالیا: لە چوارچێوەی یاسای بنەڕەتی هەموو ناکۆکییەکان لەگەڵ بەغدا چارەسەر دەکەین
سەرۆک وەزیرانی ئیتالیا لە هەولێر لەگەڵ سەرۆک وەزیرانی هەرێمی کوردستان دیدار و وتووێژی کرد .
نچیروان بارزانی لەم دیدارەدا لەسەر خواستی هەولێر بۆ چارەسەرکرانی ناکۆکییەکانی نێوان بەغدا لەچوارچێوەی دەستووری ئێراق، پێداگری کرد .
بەپێی ڕاپۆرتی کوردپرێس، جۆزپە کۆنتە سەرۆک وەزیرانی ئیتالیا دوای دیدار و وتووێژ لەگەڵ بەرهەم ساڵح سەرۆکی ئێراق و عادل عەبدولمەهدی سەروک وەزیران بە مەبەستی وتووێژ لەگەڵ کاربەدەستانی هەرێمی کوردستان شەوی ڕابردوو گەیشتە فڕگەی هەولێر و لەلایەن نێچیروان بارزانی سەروک وەزیرانی هەرێمی کوردستانەوە پێشوازیی لێ کرا .
سەرۆک وەزیرانی هەرێمی کوردستان لەم پرێس کۆنفرانسە دا وێڕای ستایشی هاوکارییەکانی ئیتالیا لە هەرێمی کوردستان لە ڕابردوو، هیواداری دەربڕی کە ئەم پشتیوانی و هاوکارییە لە داهاتووش دا درێژەی هەبێت .
بارزانی وتی :ئیتالیا یەکێک لەو وڵاتانەیە کە لە چوارچێوەی هاوپەیمانی نێودەوڵەتی بە دژی داعش یەکێک لە هاوکاران و هاوڕێیانی سەرەکی ئێراق و هەرێمی کوردستان بووە.
ناوبراو وتی : ئیتالیا هەم لە بواری ڕاهێنانی هێزی سەربازی و هەم لە بواری یارمەتی مرۆڤدۆستانە لە ئێراق و هەرێمی کوردستان، پشتیوانی کردووە و لەگەڵ وەزارەتی پێشمەرگەی هەرێم و دامەزراوەکانی هاوپێوەند، هاوکاری و ئاڵ و وێری هەمیشەیی هەبووە .
بارزانی وێڕای سوپاس بێژی لە هاوکارییەکانی پێشووی ئیتالیا لەگەڵ هەرێمی کوردستان هیواداری دەربڕی کە ئەم هاوکارییانە لە داهاتووش دا درێژەی هەبێت و وتیشی : لەبەر هەموو کاوکارییەکانیان لەگەڵ ئێمە بۆ پاسەوانی و پاراستنی بەنداوی مووسڵ و بنیات نانەوەی لەڕێگەی کۆمپانییەکانی تایبەت، ڕێز و سوپاستان دەکەین.
سەرۆک وەزیرانی هەرێمی کوردستان سەبارەت بە تەوەرەی دیدار ووتووێژ لەگەڵ سەرۆک وەزیرانی ئیتالیا وتی : لەم چاوپێکەوتنە دا سەبارەت بە پێوەندییەکانی هەولێر و بەغدا وتووێژمان کرد و پێداگری کرا کە دەوڵەتی هەرێم بەنیازە لە چوارچێوەی دەستووری ئێراق هەموو گرفت و ناکۆکییەکان لەگەڵ بەغدا، چارەسەر بکرێت .
بارزانی وتی لەسەر ئەمەش پێداگرییمان کرد کە هەرێمی کوردستان لە دەوڵەتی عادل عەبدولمەهدی پشتیوانی دەکات و خوازیاری چارەسەرکرانی گرفتەکان بوو .