ئاب 23, 2019 10:31 Asia/Tehran
  • فراکسیۆنی گۆڕان لە پەرلەمانی کوردستان: وەلانرانی شارەدارانی کورد لە تورکیا بنپێ کردنی مافی مرۆڤ و پرەنسیپەکانی دیموکراسییە

فراکسیۆنى گۆڕان له‌ په‌رله‌مانى کوردستان، له‌ ڕاگه‌یه‌نراوێکدا ئاماژه‌ به‌وه‌ ده‌کات: بڕیاری لابردنی سەرۆک شارەوانیەکانی وان، ئامه‌د و مێردین لەلایەن حکوومه‌تى تورکیاوە پێچه‌وانه‌ى مافه‌کانى مرۆڤ و پره‌نسیپه‌کانى دیموکراسیه‌ته‌.

بەپێی هەواڵی کوردپرێس، له‌ ڕاگه‌یه‌نراوه‌که‌دا ئه‌وه‌ خراوه‌ته‌ڕوو "به ‌بڕیارى وه‌زاره‌تى ناوخۆى حکوومه‌تى تورکیا سه‌رۆکى هه‌ر سێ گه‌وره‌ شاره‌وانى  وان، ئامه‌د. مێردین له‌سه‌ر کاره‌کانیان لابراون و له‌شوێنى ئه‌وان"قه‌یوم" دانراون، ئه‌م بڕیاره‌ى حکوومه‌تى تورکیا پێچه‌وانه‌ى مافه‌کانى مرۆڤ و پره‌نسیپه‌کانى دیموکراسیه‌ته‌ چوونکه‌ سه‌رۆکى شاره‌وانییه‌کان له ‌ئه‌نجامى هه‌ڵبژاردن و به‌ده‌نگى هاوڵاتیان ئه‌و پۆستانه‌یان وه‌رگرتووه ‌و ده‌بێت گۆڕینیشیان به‌هه‌مان بنه‌ماى دیموکراسیه‌ت بێت.

هه‌روه‌ک فراکسیۆنى گۆڕان رایده‌گه‌یه‌نێت: "ئێمه‌ له‌ بزووتنه‌وه‌ى گۆڕان وه‌ک هه‌میشه‌ داواى چاره‌سه‌رى ئاشتیانه‌ى کێشه‌ى کورد ده‌که‌ین به‌تایبه‌ت له‌ تورکیا که‌ به‌داخه‌وه‌ به‌هۆى چاره‌سه‌ر نه‌کردنى و درێژه‌کێشانى شه‌ڕ، ده‌یان هه‌زار هاوڵاتىی کورد و تورک بوون به‌ قوربانى و کێشه‌که‌ش رۆژ به‌رۆژ ئاڵۆزتر ده‌بێت.

له‌ به‌شێکى ترى ڕاگه‌یه‌نراوه‌که‌ی بزووتنەوەی گۆڕاندا  باس له‌وه‌ کراوه ‌"حکوومه‌تى تورکیا له ‌چه‌ند ساڵى رابردوودا پرۆسه‌ى ئاشتى راگه‌یاند و به‌و هه‌نگاوه‌ش سه‌قامگیرى و گه‌شه‌کردنێکى خێرا له‌ کوردستانی تورکیا روویدا، هه‌موو گه‌لانى تورکیا به‌ چاره‌سه‌رکردنى کێشه‌کان له‌ رێگاى دیالۆگ و ئاشتییه‌وه‌ خۆشحاڵ و سوودمه‌ند بوون، بۆیه‌ ئێمه‌ پشتیوانى ئه‌و رێگا راست و هاوچه‌رخه‌ ده‌که‌ین و ده‌خوازین سه‌رۆکى گه‌وره‌ شاره‌وانییه‌کانیش له‌شوێنى خۆیاندا ده‌سبه‌کار ببنه‌وه‌".