دیوانی جه‌نگ نامه‌ی نادرشا که‌ له‌ لایه‌ن ئه‌ڵماس خانی که‌نووڵه‌ییه‌وه‌ نووسراوه‌ به‌ هه‌ورامی بڵاو کرایه‌وه‌

به‌ ڕاپۆرتی ئاژانسی مێهر ئه‌م کتێبه‌ له‌ سه‌رده‌می نادرشای ئه‌فشار و له‌ لایه‌ن ئه‌ڵماس خانه‌وه‌ که‌ خه‌ڵکی کرماشان بووه‌ به‌ شێوه‌زاری هه‌ورامی - گۆڕان نووسراوه‌.

دیوانی جه‌نگ نامه‌ی نادرشا له‌ لایەن دەزگای پەخش و چاپی ئێران (قەقنەس) و لە ۵۴۶ لاپەڕەدا چاپ و ڕەوانەی بازاڕەکانی ئێران کراوه‌.

ئەم دیوانە شیعرییە ل ەلایەن مەزهەر ئەدوایی بە زمانی فارسی شرۆڤە و پەراوێزنووسی بۆ کراوە. ئەم نووسەرە لە ماوەی پێنج ساڵدا توانیویە دە جۆر دەستنووس له‌ جەنگ نامەی نادرشا کۆ بکاتەوە و پاش بەراوردکردن و پەراوێز نووسین بە زمانی فارسی لەگەڵ دەقە هەورامییەکەیدا چاپی بکات.

ئەڵماس‌ خان کەنوولەیی شاعیر و فەرماندەی سوپای نادر شای ئەفشار لەم بەرهەمە مەنزوومە حەماسییەدا کە بە شیوەزاری هەورامی هۆنراوەتەوە، باروودۆخی سەردەمی نادرشا و بە تایبەت شەڕەکانی نادر لەگەڵ عوسمانییەکان، هیندییەکان، ئوزبەکەکانی بە هۆنراوە نووسیوەتەوە، کە ئەڵماس‌ خان خۆی وەک فەرماندەیەک لە زۆربەیاندا بەشدار بووە، بە وردبینی و حەماسەتەوە ڕه‌وایه‌تی دەکات و بە ڕوونیش زانیارییەکی زۆری ئەو سەردمە دەخاتە بەر دەستی خوێنەران و لیکۆڵەران.

بەرهەمەکە بەگشتی لە ٣٥١٣ بەیت پێکهاتووە کە لەڕووی ٩ کۆپیی خەتی، کە بریتین لە ۵ کۆپیی کتێبخانەکانی ئێران و ٤ کۆپیی کتیبخانەی بەرلین وەرگیراوە و کاری ڕاست کردنەوە و پێداچوونەوەی بۆ کراوە.

 

 

 

 

 

Aug 10, 2017 10:28 Asia/Tehran
بۆچوونت