• گه‌مارۆدرانی ۲۵۰ هه‌زار هاووڵاتی له‌ حه‌ڵه‌ب وه‌درۆخرایه‌وه‌

ئیگۆر کۆناشنکۆف، وته‌بێژی وه‌زاره‌تی به‌رگری ڕووسیا ڕه‌تی کرده‌وه‌ که‌ ۲۵۰ هه‌زار شارومه‌ند له‌ حه‌ڵه‌ب گه‌ماڕۆ درابێت.

به‌پێی  ڕاپۆرتی ئاژانسی مێهر له‌ سپۆنتیک، وته‌بێژی وه‌زاره‌تی ده‌ره‌وه‌ی ڕووسیا ڕایگه‌یاند که‌ هه‌واڵی گه‌ماڕۆدانی شارومه‌ندانی شاری حه‌ڵه‌ب دووره‌ له‌ ڕاستی.

هه‌ر له‌مباره‌وه، ژنراڵ ئیگۆر کۆناشنکۆف، وته‌بێژی وه‌زاره‌تی به‌رگری ڕووسیا جه‌ختی کرد: گرووپه‌ چه‌کداره‌کان هه‌موو قوتابخانه‌کان و نه‌خۆشخانه‌کانی ڕۆژهه‌ڵاتی حه‌ڵه‌بیان کردبووه‌ حه‌شارگه‌ی چه‌ک و ته‌قه‌مه‌نی و سوپای سووریا زۆر به‌ باشی به‌رگری له‌ خه‌ڵکی سڤیل کرد.

ئه‌و له‌ میانه‌ی قسه‌کانی خۆیدا جه‌ختی کرد: ڕۆژاوا گوێی به‌ پێشنیاره‌کانی ئێمه‌ بۆ ناردنی یارمه‌تییه‌ مرۆڤییه‌کان نه‌دا، تاکوو ئێستاش ئه‌م داواکارییانه‌ی ئێمه‌ وڵامیان نه‌دراوه‌ته‌وه.

وته‌بێژی وه‌زاره‌تی به‌رگری ڕووسیا ڕایگەیاند : ڕه‌تی ده‌که‌ینه‌وه‌ ۲۵۰ هه‌زار که‌سی سڤیل گه‌ماڕۆ درابێت، تیرۆریسته‌کان ده‌یانویست ۱۰۰ هه‌زار که‌س بکه‌نه‌ قه‌ڵغانی مرۆڤی، به‌ڵام ئه‌مانه دواجار له‌ لایه‌ن سوپای سووریاوه‌ ڕزگار کران.

پێشتر کاناڵی ئه‌لجه‌زیره‌ ڕایگه‌یاند بوو که‌ به‌ ده‌یان هه‌زار که‌س له‌ حه‌ڵه‌ب گه‌ماڕۆ دراون و بوونه‌ته‌ ئامانجی هێرشه‌ ئاسمانییه‌کان و داوای یارمه‌تی له‌ کۆمه‌لگای نێونه‌ته‌وه‌یی ده‌که‌ن.

شایانی باسه‌ که‌ وه‌زاره‌تی به‌رگری ڕووسیا ڕایگه‌یاندووه‌ که‌ ته‌نیا ۳ کیلۆمه‌تر له‌ شاری حه‌ڵه‌ب به‌ ده‌ستی تیرۆریسته‌کانه‌وه‌ ماوه.

Dec 14, 2016 13:20 Asia/Tehran
بۆچوونت