• نازم دەباغ: بارزانی هاوکاریی بەرهەم دەکات

نوێنەری هەرێمی کوردستانی ئێراق لە تاران، نەیارەتییەکانی مەسعوود بارزانی ڕێبەری پارتی دیموکراتی کوردستانی ئێراق لە گەڵ بە سەرۆک کۆمار بوونی بەرهەم ساڵحی بە بگرە و بەردەیەکی زۆر باو و ئاسایی لە جیهانی سیاسەت زانی و وتی کە ئەم دوو کەسایەتییە بێ گومان پێکەوە هاوکاری دەکەن.

بە پێی ڕاپۆرتی هەواڵدەریی تەسنیم؛ ئێوارەی سێشەممە ٢١٩ نوێنەری پەرلەمانی ئێراق بە دەنگی ئەرێنی خۆیان، "بەرهەم ساڵح" بەربژاری یەکێتی نیشتمانییان هەڵبژارد بۆ پۆستی سەرۆک کۆمارەتی ئەم وڵاتە. "فواد حسێن" بەربژاری پارتی دیموکراتی کوردستانی ئێراق گرینگترین و بەرچاوترین خەنیمی "بەرهەم ساڵح" لەو هەڵبژاردنانەدا بوو. ئەوە یەکەم جارە کە دوو پارتی گەورە و سەرەکیی کورد بە شێوەی جیا جیا بەربژار پێناسە دەکەن بۆ پۆستی سەرۆک کۆمارەتیی ئێراق.  بە مەبەستی لێکدانەوەی کاریگەرییەکانی هەڵبژاردنی بەرهەم ساڵح لە سەر داڕشتی سیاسیی ئێراق و ئاسۆی ڕووداو و گۆڕانکارییەکانی هەرێمی کوردستان وتووێژێکمان لەگەڵ نوێنەری ئەم هەرێمە لە تاران ئەنجام دا کە بەشێکی لێرەدا هاتووە:

نازم دەباغ لە پێوەندی لەگەڵ هەڵبژێردرانی "بەرهەم ساڵح" وەکوو سەرۆک کۆماری نوێی ئێراق  و کاریگەری دانانی لە سەر داڕشتی سیاسیی ئەم وڵاتە بەتایبەت لە سەر هەرێمی کوردستان وتی: پاش بەڕێوەچوونی ڕفراندۆمی جیا بوونەوە کە ساڵی ڕابردوو لە هەرێمی کوردستان بەڕێوە چوو و چەن ساڵێکیش لە سەرۆک کۆمارەتی "فواد مەعسووم " تێدەپەڕی، وڵاتەکەمان پێویستی بە هەندێ گۆڕانکاری هەبوو. لە وەها ڕەوشێکدا "بەرهەم ساڵح" وەکوو سەرۆک کۆماری نوێی ئێراق لە کەشێکی دیموکراتیکدا هەڵبژێردرا. "بەرهەم ساڵح" لە بواری ستراتژیی و ڕێبازی سیاسییەوە پەیڕەوی خوالێخۆشبوو "جەلال تالەبانی"ـیە. بەرهەم ساڵح لە چوارچێوی هەر ئەو ستراتژییەدا دەتوانێ دەورێکی پۆزتیڤ لە بەدیهێنانی یەکێتی، دامەزراندنی ئاشتی و ئاسوودەیی خەڵک بگێڕی و پێوەندییەکانی ئێراق لە گەڵ وڵاتانی داروسێی پەرە پێ بدات. بێ گومان ئەو مەسەلە گرینگە، پێویستی بە هاوکاری چەن لایەنەی گرووپ و کۆتلە سیاسییەکانی ئەم وڵاتەیە  و بە هۆی ئەوەی باش کەسایەتیی بەرهەم ساڵح دەناسم، دڵنیام کە لێهاتویی و شارەزایی پێویستی هەیە بۆ گەیشتن بەو ئامانجانە.

نوێنەری هەرێمی  کوردستانی ئێراق لە تاران وتیشی: کەسایەتی مەسعوود بارزانی بە لەونێکە کە کاتێک قازانج  وبەرژەوەندیی کوردی پێویستی بە هەڵوێستی نوێی ئەو بێ، ١٠٠% ئەو کارە دەکات و بۆ چارەسەر کردنی کێشە و گرفتی کوردەکان دەستی یارمەتی دەنێتە نێو دەستی بەرهەم ساڵحەوە. لێرەدا پێویستە ئەوەش بڵێم کە پارتی  و یەکێتی و یان هەر گرووپ و کۆتلەیەکی تر هەتا ئەو کاتەی کە پێبەندی یاسای بنەڕەتیی ئێراق بن و لە چوارچێوی هەر ئەو یاسایەدا ، بەربژاری یەکێک لە پارتەکان هەڵبژێردرێ، دەبێ پێکەوە هاریکاری بکەن.

 

Oct 09, 2018 13:53 Asia/Tehran
بۆچوونت