سوپای سووریا ناوچەگەلێکی نوێی لە پارێزگای ڕەققە لەباکووری ئەو وڵاتە لەدەست گرووپی ڕەشەکوژیی تەکفیریی داعش، ڕزگار کرد.

بەپێی ڕاپۆری هەواڵدەریی ئیرنا، ماڵپەڕی ڕاگەیاندنی وەزارەتی بەرگریی سووریا ڕایگەیاند: یەکەکانی سوپا لە درێژەی پاکتاوکردنی ناوچە ڕۆژهەڵاتییەکانی ئەو وڵاتە، ئاوایی زملەی ڕۆژهەڵاتی، وێستگەی پۆمپاژ و کێڵگەی گازیی زەملەو کێڵگەی نەوتیی فەهەد لەباشووری ڕەققەیان پاکتاو کرد.

لەو ئۆپراسیۆنەدا دەیان تیرۆریستی داعشی کوژران، دوو تانک، ئۆتۆمبیلێکی بۆمب ڕێژکراو و چوار ئۆتۆمبیلی تەیارکراو بە ڕەشاش، تێکشکێندرا.

سەرکردایەتی گشتیی سوپاو هێزە چەکدارەکانی سووریا رۆژی یەکشەممەش لە بەیاننامەیەکدا ڕایگەیاند: بە دەرپەڕاندنی گرووپی تیرۆریستیی تەکفیریی داعش، ئاسایشی بەتەواوەتی شارۆچکەکانی دێرحافر و مەسکەنەو ناوچەکانی دەورووبەری لە ڕۆژهەڵاتی پارێزگای حەڵەب دابین کراوە.

سەرکردەی یەکێ لە یەکە ئەندازیارییەکانی سوپای سووریا وتی: یەکە ئەندازیارییەکانی سوپا، ئۆپراسیۆنی هەڵگرتنەوەی مین و بۆمبە دانراوەکانی تیرۆریستان لە یانزە گوند و شارۆچکەی سەر بەناوچەی ڕەبیعە لە گردووپەڕی باکووری لازقییەیان کۆتایی پێهێناو بارودۆخیان تەیار کرد بۆ گەڕانەوەی خەڵک بۆ سەر ماڵ و حاڵی خۆیان.

Jul 17, 2017 16:56 Asia/Tehran
بۆچوونت