پۆمپێئو: ئەمریکا سوورە لەسەر کشانەوە لە سوریا
مایک پۆمپێئو وەزیری دەرەوەی ئەمریکا لە چاوپێکەوتن لەگەڵ عادل عەبدولمەهدی سەرۆک وەزیرانی ئێراق باسی درێژەی کشانەوەی چەکدارانی وڵاتەکەی لە سوریا بەشێوەی هێدی هێدی و بەرنامە بۆکراوی کرد .
بەپێی ڕاپۆرتی ئیرنا، پۆمپێئو لە ڕەوتی سەفەری ڕۆژی چوارشەممەی بۆ بەغدا، دوای چاوپێکەوتن لەگەڵ بەرهەم ساڵحی سەرۆکی ئێراق لەگەڵ عادڵ عەبدولمەهدی سەرۆک وەزیران و فەرماندەی گشتیی هێزە چەکدارەکانی ئەم وڵاتە دیداری کرد .
بەپێی بەیاننامەی سەرۆک وەزیرانی ئێراق عەبدولمەهدی لەم دیدارەدا لەسەر گرینگایەتی پێوەندی دوو لایەنە بە تایبەت لە بواری بەرەنگار بوونەوەی تاقمی تیرۆریستی داعش و هەروەها هاوکاری لەبەشی وزە و ئابووری پێداگری کرد .
عەبدولمەهدی پێداگری کرد کە ئێراق وڵاتێکی دیمۆکراتیک و ڕوولەگەشەیە و لەسەر سەقامی ناوچە و دامەزرانی پێوەندی لەگەڵ وڵاتانی عەرەبی و دۆست و هەموو وڵاتانی دراوسێ پێداگری کرد .
لەم دیدارە هەروەها پرسی کشانەوەی سەربازیی ئەمریکا لە سوریا خرایە بەر باس کە پۆمپێئو وتی واشینگتۆن سوورە لەسەر چوونەدەری بەرنامەبۆکراو لە سوریا و ئەویش بە هاوکاری و هەماهەنگی لەگەڵ ئێراق.