عێراقچی: ئێران و یەکێتی ئوروپا دەبێ بگەنە لێک تێگەیشتنێکی هاوبەش لە پرسە ناوچەییەکان
یاریدەری وەزیری دەرەوەی ئێران جەختی کرد: تاران و بروکسێل دەبێ بگەنە لێک تێگەیشتنێکی ئاشتیانەو هاوبەش لەمەڕ جیاوازی ڕوانگەکان لەبارەی پرس و بابەتە ناوچەییەکان.
بەپێی ڕاپۆری هەواڵدەریی ئیرنا؛ سەیید عەبباس عێراقچی یاریدەری مافەوانی و نێودەوڵەتیی وەزیری دەرەوەی ئێران ئەمڕۆ سێ شەممە لە جڤینی"هاوکارییە ناڤۆکییەکان، پێشکەوتن و ئاسۆکان" لە ئیسفەهانی ناوەندی ئێران بەئاماژە بەوەی کە هاتنەدی لێک تێگەیشتنێکی هاوبەش و یەکسان و دەسپێکرانی هاوکارییەکان لەمەڕ پرسە ناوچەییەکان، دەس دەخرێ ، وتی: پاش جێ بەجێ کرانی بەرجام، پەیوەندییەکانی ئێران و یەکێتی ئوروپا زۆر گەشەی کردووەو دوو لایەن خاوەن پەیوەندیی شیاون.
یاریدەری وەزیری دەرەوەی ئێران وێڕای ڕێزگرتن لە هەڵوێستی ئوروپییەکان لەداکۆکی کردن لە بەرجام و هەوڵە گرینگەکانیان لەو بارەوە، هیوای خواست: دوولایەن بتوانن بەهاوکاری هاوبەش، لەئەنجامەکانی ئەو ڕێککەوتنە سوود وەربگرن.
عێراقچی بەئاماژە بەوەی کە کۆماری ئیسلامیی ئێران هەوڵی داوە پێبەندی بەڵێنیەکانی بێ لەهەمبەر بەرجامدا، وتی: ئێران چاوەڕوانە لایەنەکانی دیکەش پێبەندی بەڵێنیەکانیان بن.
جڤینی"هاوکارییە ناڤۆکییەکان، پێشکەوتن و ئاسۆکان" لەچوارچێوەی سێهەمین خولی وتووێژەکانی ئاستی باڵای ئێران و یەکێتی ئوروپا، ئەمڕۆ سێ شەممە لەئیسفەهان دەسپێکراو هەتا سبەی چوارشەممە درێژەی هەیە.
سێهەمین خولی وتووێژەکانی ئاستی باڵای ئێران و یەکێتی ئوروپا بەسەرۆکایەتی سەیید عەبباس عێراقیچی وهێلگا شمید یاریدەری بەرپرسی سیاسەتی دەرەوەی یەکێتی ئوروپا دوێنێ دووشەممە لە تاران بەڕێوە چوو.