ڕۆحانی : پتەوبوون و ڕاپەڕێندرانی هەنگاوی هاوبەش ئاسانکاری دەکات بۆ پەرەسەندنی پەیوەندییەکانی یەکێتیی ئەورووپا لەگەڵ ئێران
سەرۆک کۆماری ئێرانی ئیسلامی، پتەوبوون و ڕاپەڕێندرانی هەنگاوی هاوبەشی بە بەستێن خۆش کەری پەرەسەندنی پەیوەندییەکانی یەکێتیی ئەورووپا لەگەڵ ئێران زانی و وتیشی: دەبێ تەواوی لایەنەکان پێبەندی بەڵێنەکانیان بن لە بارەی هەنگاوی هاوبەشەوە و جێبەجێی بکەن.
حەسەن ڕۆحانی سەرۆک کۆماری ئێرانی ئیسلامی ڕۆژی چوارشەممە لە دیداری ( ئالفۆنسۆ داستیس) وەزیری دەرەوەی ئەسپانیا لە تاران، وێڕای ئاماژە کردن بەمەی کە دوای واژۆ کران و ڕاپەڕێندرانی ڕێککەوتنی ناڤۆکی ئیدی هیچ هۆیەک بۆ مشت و مڕی دووبارە و دانوستان بەدی ناکرێت، وتیشی: ئێران هەتا ئەو کاتەی کە لایەنی بەرامبەر بەڵێنەکانی لەمەڕ هەنگاوی هاوبەشەوە جێبەجێ بکات، پێبەندی دەبێت.
سەرۆک کۆماری ئێرانی ئیسلامی ئاسایشتی ناوچەیی ، کۆتایی هێنان بە قەڵاچۆی خەڵک لە پێکدادانەکانی یەمەن و خەباتی دژی تیرۆریزمی لە ڕیزی ئەو بابەتە گرینگانە زانی کە دەشێ بەستێن بۆ هاریکاریی ئەرێنیی ئێران و یەکێتیی ئەورووپا خۆش کات و وتی: هەمووان دەبێ یارمەتیدەر بن بۆ ئەوەی دۆخی نالەباری یەمەن هەرچی خێراتر کۆتایی پێ بێت و سنوورەکانی ئەم وڵاتە بۆ ناردرانی یارمەتیی مرۆڤ دۆستانە سانا بکرێت.
( ئالفۆنسۆ داستیس) وەزیری دەرەوەی ئەسپانیاش لەم دیدارەدا، ئێرانی وەک وڵاتێکی بەهێز و کاریگەر لە ناوچەکەدا پێناسە کرد و وێڕای پێداگرتن لە سەر پشتیوانیی تۆکمەوتەواوی یەکێتیی ئەورووپا لە بەردەوام کران و پاوەجێ بوونی هەنگاوی هاوبەش وتیشی: پەرەسەندنی پەیوەندی لەگەڵ ئێران بۆ ئەسپانیاو وڵاتانی ئەندامی یەکێتیی ئەورووپا گرینگە و لە سای بەردەوام کرانی هەنگاوی هاوبەش دەکرێ ئەم پەیوەندییانە پتەوتر بکرێنەوە.
( ئالفۆنسۆ داستیس) وەزیری دەرەوەی ئەسپانیا تیشکی خستە سەر پێویستیی خۆتێگەیاندنی وڵاتانی کاریگەر لە ناوچەکە بۆ کۆتایی هێنان بە هەل و مەرجی ئاڵۆزی مرۆڤی لە یەمەن و وتیشی: تەواوی وڵاتان دەبێ گرینگایەتی بدەن بە چەسپێندرانی ئاشتی، ئاسایشت و سەقام لە ناوچەکەداو لەم ئاراستەیەدا پێش بە هەرچەشنە ململانێیەکی چەکەمەنیانە بگیردرێت.
حەسەن ڕۆحانی سەرۆک کۆماری ئێرانی ئیسلامی و ( ئالفۆنسۆ داستیس) وەزیری دەرەوەی ئەسپانیا هەروەها لەم چاوپێکەوتنەدا وێڕای ئاماژە کردن بە توانایی و بارستای بەربڵاوی هاوکاری لە نێوان ئێران و ئەسپانیا ، لە سەر پێویستیی هەوڵدان بۆ گەشەو هێزمەندو پتەو کرانەوەی هەمەلایەنەی پەیوەندییەکانی دوو وڵات جەختیان کرد.