ئادار 23, 2017 20:28 Asia/Tehran
  • 
گیرانی ۷ کەس هاوپەیوەند بە هێرشەکەی لەندەن

پۆلیسی‌ به‌ریتانیا ڕایگه‌یاند، حه‌وت که‌سیان به‌تۆمه‌تی‌ تێوەگلان بە ‌هێرشه‌که‌ی‌ دوێنێی‌ له‌نده‌ن ده‌ستگیرکردووه.

بە پێی ڕاپۆرتی ئاژانسی هەواڵی مێهر، پۆلیس ئاماژه‌ی‌ به‌وه‌کردووه، له‌چه‌ند هه‌ڵمه‌تێکی‌ گه‌ڕان و پشکنیندا ئه‌و حه‌وت که‌سه‌ له‌شه‌ش شوێنی‌ جیاوازی‌ به‌ریتانیا ده‌ستگیرکراون و گومانلێکراون به‌ تیوه‌گلان له‌ هێرشه‌که‌ی‌ دوێنێی‌ له‌نده‌ن.

له‌لایه‌کی دیکه‌وه‌ مارک رۆولی، سه‌رۆکی هێزه‌کانی دژه‌ تیرۆری به‌ریتانیا، به‌ بی بی سی ڕاگه‌یاندووه‌ که‌ به‌درێژایی شه‌وێ ڕابردوو سه‌دان لێکۆڵه‌ر و پۆلیس چه‌ندین هه‌ڵمه‌تیان له‌شه‌ش شوێنی به‌ریتانیا ئه‌نجامداوه‌ و توانیویانه‌ حه‌وت که‌س ده‌ستگیربکه‌ن.

وتیشی ده‌ستگیرکراوه‌کان له‌ چه‌ندین نه‌ته‌وه‌ی جیاوازن و ئافره‌تێکیشی تێدایه‌ که‌ ته‌مه‌نی له‌ چله‌کاندایه‌ و هه‌روه‌ها یه‌کێک له‌ پیاوه‌کان ته‌مه‌نی له‌ په‌نجا ساڵیدایه.

حه‌وت له‌ برینداره‌کانی ڕووداوه‌که‌ تائێستا له‌ نه‌خۆشخانه‌ن و حاڵه‌ته‌کانیان مه‌ترسیداره.

رۆولی له‌ به‌یاننامه‌یه‌کدا رایگه‌یاندووه‌:" لێکۆڵینه‌وه‌کان له‌ بێرمینگهام و له‌نده‌ن و چه‌ند به‌شێکی  دیکه‌ی وڵات به‌رده‌وام ده‌بێت".

ئێوارەی ڕابردوو پۆلیسی بریتانیا لە کوژرانی ۲ کەس و بریندار بوونی ۱۲ لە هاووڵاتیانی ئەم وڵاتە بە هۆی تەقە کردن لە بەردەم پەرلەمانی ئەم وڵاتە لە شاری لەندەن هەواڵیان دا.