عەبادی : داعش لە مووسڵ لەناوچووە
چەند کاتژمێر لەمەوبەر دوای بڵاو بوونەوەی ڕاپۆرتگەلێک سەبارەت بە شکستی تیرۆریستانی داعش لە دوایین گەڕەکەکانی بەشی کۆنی مووسڵ، سەرۆک وەزیرانی ئێراق ڕایگەیاند : کاتی ڕاگەیاندنی ئازاد کرانی مووسڵ نیزیکە و داعش بە تەواوی ڕوو لە لەناوچوونە.
بەپێی ڕاپۆرتی حەیدەرعەبادی سەرۆک وەزیرانی ئێراق شەوی سێ شەممە ڕایگەیاند : کاتی ڕاگەیاندنی ڕەسمیی ئازاد کرانی مووسڵ نیزیک بووە و هێزەکانی ئێراقی کونترۆڵی زۆربەی ناوچەکانی ئەم شارەیان جگە لە گەڕەکێکی بچووک بە دەستەوە گرتووە .
عەبادی بە ئاماژەدان بە درێژەی شەڕی قوسی هێزەکانی چەکداری عێراقی لەگەڵ تاقمی تیرۆریستیی داعش لە مووسڵ وادەی بە خەڵکی ئێراق دا لە ڕۆژانی پشوودانی جەژنی ڕەمەزان چاوەڕوانی هەواڵی خۆش و سەرکەوتنی مەزن لە ناوچەکانی ئۆپراسیۆن دا بن .
سەرۆک وەزیرانی ئێراق وتیشی : داعش لە دوایین ناوچە کە لە ڕۆژاوای مووسڵ کەوتە داوی هێزەکان و هەوڵ دەدات هەرچی زۆرتر زەرەزوزیانی ماڵی و مرۆیی لە خەڵکی سیڤیل بدات .
فەرماندەیی سوپای ئێراق شەوی سێ شەممە ڕایگەیاند لە بەشەکانی کۆنی مووسڵ خەریکن سەردەکەون و هێزی تیرۆریستی داعش تەنیا لە چەند کۆچە و کۆڵان و ماڵ دان.
بەپێی ئەم ڕاپۆرتە ئێستا هێزی ئێراقی لە مووسڵی کۆن خەریکن بە یەک دەگەنەوە و لە شەقامی فارووق بەرەو ڕۆژهەڵاتی ئەم ناوچەیە و لێواری ڕۆژاوایی دیجلە دەچن کە بەپاکتاوکردنی ئەم چەند ماڵ و گەڕەکە ئوپراسیۆنی ئازاد کردنی مووسڵیش کۆتایی پێ دێت .
