May 26, 2018 13:18 Asia/Tehran
  • مامۆستا محەممەدساڵح ئیبراهیمی کۆچی دوایی کرد

دوکتور محەممەد ساڵح ئیبراهیمی ناسراو بە "شەپۆل" نووسەر، وەرگێڕ، لێکۆڵەر و ڕۆژنامەنووس، ئەمڕۆ شەممە لە تەمەنی هەشتاو پێنج ساڵی دا دوای چل ڕۆژ مانەوە لە نەخۆشخانە لەبەر جەڵتەی مێشک و لەحاڵەتی کۆما دابوون، لە یەکێک لە نەخۆشخانەکانی تاران، کۆچی دوایی کرد .

مامۆستا محەممەد ساڵح ئیبراهیمی لە شاری مەهاباد لە ڕۆژی چواری جۆزەردانی ساڵی 1312  لەبنەماڵەیەکی ئەدەبی  لە دایک بوو . 

بەڕێزیان تائێستا  زۆرتر لە چل کتێبی نووسیوە و خاوەنی چەندین وەرگێڕاو بەزمانی کوردییە . ناوبراو هەروەها بەرپرسی گۆڤاری مانگای گرشەی کوردستان لەساڵانی  1358 هەتا 1359 بوو  کە نۆ ژمارەی لێ  بڵاو کراوەتەوە.

دوکتور ئیبراهیمی بەرپرس و بەڕێوەبەری ئەنجومەنی  زمان و فەرهەنگ و هونەری کوردی لە تاران بوو  .بەڕێزیان قورئانیشی بە زمانی کوردی وەڕگێڕاوە و تائێستا چەندین جاریش لەچاپ  دراوە.

مامۆستا شەپۆل ساڵانێکی زۆریش لە گەڵ رادیۆ کوردی  دەرەوە سنووریی سەدواسیمای کۆماری ئیسلامی دا  بە نووسین و خوێندنەوەی بەرنامەی جۆربەجۆر هاوکاری هەبوو .

کەناڵی سەحەری کوردی بەم بۆنەوە سەرەخۆشی دەکات لە بنەماڵەی ئەو بەڕێزە بە تایبەت شایستە خانمی کچی و کاک ئازادی کوڕی کە لە هاوکارانی ئەم کەناڵەن .