بریندار بوونی ٤ سەربازی زایۆنی لە قودسی داگیرکراو
ژێدەرە هەواڵییەکان سەر لە بەیانی یەکشەممە باسی بریندار بوونی ٤ سەربازی زایۆنییان کرد لە قودسی داگیرکراودا.
بە پێی ڕاپۆرتی ژێدەرە هەواڵییەکان، فەلەستینییەک بە ئۆتۆمبیل ژمارێک سەربازی ئیسراییلی لە ناوچەی "حزما" لە باکووری ڕۆژهەڵاتی قودسی داگیرکراو کردە ژێرەوە و ٤ کەسیانی بریندار کرد.
ڕژێمی زایۆنی دوابەدوای ئەو ڕووداوە هێزە سەربازییەکانی خۆی بەڕێ کرد بۆ ئەو ناوچەیە و حاڵەتی ئامادەباشی راگەیاندووە بۆ دیتنەوەی ئۆتۆمبیل و شۆفێرەکەی.
ژێدەرە هەواڵییەکان هەروەها ڕایانگەیاندووە ، کە دۆخی تەندرووستی یەکێک لەو سەربازە زایۆنییانە نالەبارە.
گرووپەکانی خۆڕاگریی فەلەستینی لەوان بزووتنەوەی خۆڕاگریی ئیسلامیی فەلەستین (حماس) و بزووتنەوەی جەهادی ئیسلامیی فەلەستین بەردەوام رایانگەیاندووە ئەو کردەوانە وەڵامێکی ئاسایی بە جەنایەتەکانی داگیرکەران دژ بە گەلی فەلەستینە.
ڕۆژانە بە دەیان فەلەستینی لە ناوچە جۆربەجۆرەکانی فەلەستینی داگیرکراو بە دەستی سەربازان و شارۆچکەنشینانی زایۆنی شەهید و یان بریندار دەبن و ژمارێکی زیاتریشیان دەگیردرێن و دەگوازرێنەوە بۆ بەندیخانەکانی ئیسراییل.