رەخنەی توندی یەکگرتوو لە دەسەڵاتدارانی هەرێمی کوردستان
سەرۆکی ئەنجومەنی سەرکردایەتی یەکگرتووی ئیسلامی کوردستان ڕایدەگەیەنێت، حکومەتی هەرێم هیچ هەوڵێکی جددی بۆ چارەسەکردنی کێشەی مووچەخۆران نەداوە.
بە پێی راپۆرتی میدیاکانی هەرێم ، هادی عەلی، سەرۆکی ئەنجومەنی سەرکردایەتی یەکگرتووی ئیسلامی کوردستان لەتویتێکدا ئاماژە بۆ ئەوە دەکات، دوای ڕاگرتنی مەرجداری شایستە داراییەکانی پەیوەست بە مووچەی فەرمانبەرانی هەرێم، حکومەتی هەرێم هیچ هەوڵێکی جددی بۆ چارەسەکردنی ئەو کێشەیە نەداوە.
وتیشی”بێباکیی لایەنەکانی دەسەڵات سەبارەت بە بژێوی و موعاناتی خەڵک، مەخابن هەموو سنوورێکی بەرپرسیارێتی قانونی و ئەخلاقیشی تێپەڕاندوە”.
ئەمەش لەکاتێکدایە، ڕۆژی 12ی ئەم مانگە، پەڕلەمانی عیراق بەبێ کورد پڕۆژە یاسای وەرگرتنی قەرزی پەسەندکرد، بەپێی یاساکەش دەبێت لەبەرامبەر ڕەوانەکردنی پارە بۆ هەرێمی کوردستان، هەرێمیش بڕێک لەنەوت و 50%ی داهات ڕەوانەی بەغدا بکات، بەڵام تاکوو ئێستاش حکومەتی هەرێم هیچ بڕە نەوتێکی ڕەوانی عیراق نەکردووە، ئەمەش کاریگەری لەسەر نەدانی مووچە و هاوکات خراپی دۆخی مووچەخۆان و هاووڵاتیانی هەرێمی کوردستان دروست کردووە.