چاک بوونەوەی پتر لە ١١١ ھەزار کەس لە توشبووانی ڤایرۆسی کۆرۆنا لە ئێران
وەزارەتی تەندروستی و دەرمان و ڕاھێنانی پزیشکیی ئێران، ڕایگەیاند: ھەتا ئێستا ١١١ ھەزارو ١٧٦ کەس لە توشبووانی ڤایرۆسی کۆرۆنا لە وڵات چاک بوونەتەوەو نەخۆشخانەکانیان بەجێ ھێڵاوە.
«کیانوش جەھانپوور» سەرۆکی ناوەندی پەیوەندیی گشتی و ڕاگەیاندنی وەزارەتی تەندروستی و دەرمان و ڕاھێنانی پزیشکیی ئێران، ڕۆژی چوارشەممە لە وتووێژێکدا لەگەڵ پەیامنێران، سەبارەت بە دوایین ڕێژەی توشبووانی ڤایرۆسی کۆرۆنا لە ئێران وتی: لە ماوەی ٢٤ کاژێری ڕابردوو دووھەزارو ٨٠ نەخۆشی تازە ناس کراون.
جەھانپوور وتیشی: لە نێو توشبووانی تازەدا، ٤١٢ کەسیان خوێندراون و ٦٦٨ کەسیش پەیوەندییان بە توشبووانەوە ھەبووە کە ئەوانیش ناس کران و لە ئێستادا سەرجەم توشبووانی کۆڤیدی_١٩ لە ئێراندا گەییشتوونەتە ١٤١ ھەزارو ٥٩١ کەس.
سەرۆکی ناوەندی پەیوەندیی گشتی و ڕاگەیاندنی وەزارەتی تەندروستی و دەرمان و ڕاھێنانی پزیشکیی ئێران، ھەروەھا ئاماژەی کردە گیان لەدەست دانی ٥٦ نەخۆش لە ماوەی ٢٤ کاژێری ڕابردووداو وتی: ئەوانەی لە بەر ڤایرۆسی کۆرۆنا لە ئێراندا گیانیان لە دەست داوە گەییشتوونەتە حەوت ھەزارو ٥٦٤ کەس.
ژمارەی توشبووانی ڤایرۆسی کۆرۆنا لە جیھانیش گەییشتووەتە نزیکەی ٥ ملوێن و ٧٠٥ ھەزار کەس کە لەم ژمارەیە لانیکەم ٣٥٢ ھەزار کەس گیانیان لە دەست داوەو زیاتر لە دوو ملوێن و ٤٤٨ ھەزار کەسیش چاک بوونەتەوەو نەخۆشخانەکانیان بەجێ ھێڵاوە.
