ناڕەزامەندی دەربڕینی پەرەستارە ژاپۆنییەکان لەمەڕ داخوازییەکەی لێژنەی ئۆلەمپیکی تۆکیۆ
May 04, 2021 16:38 Asia/Tehran
پەرەستارانی ژاپۆنی بەرامبەر بە داخوازیی لێژنەی بەرپاکردنی یارییەکانی ئۆلەمپیکی تۆکیۆ بۆ بەکار ھێنانی ٥٠٠ پەرەستار لەو یارییانەدا ناڕەزامەندییان دەریڕی.
بە پێی ڕاپۆرتی ھەواڵدەریی فارس، پەرەستارانی ژاپۆنی ڕۆژی دووشەممە ڕایانگەیاند: ئەم داخوازییە لەگەڵ ھەل و مەرجی نائاسایی کۆرۆنا لە پارێزگا جۆربەجۆرەکانی ئەم وڵاتە ناگونجێ.
بە قسەی پەرەستارانی ناڕازیی ژاپۆنی ئامادە نەبوونی تەنانەت یەک پەرەستاریش لە نەخۆشخانەکاندا دەرەنجامێکی نالەباری لێ دەکەوێتەوەو کادێرەکانی داوودەرمان دەبێ لە سەر نەخۆش و ناوەندەکانی چارەسەری چڕ ببنەوە.
یارییەکانی ئۆلەمپیکی ھاوینەی تۆکیۆ بڕیار وا بوو لە ٢٣ ھەتا ٢٨ی مانگی ئوتی ساڵی ڕابردوو بەڕێوە بچێت، بەڵام لە بەر تەشەنای جیھانیی ڤایرۆسی کۆرۆنا ئەم یارییانە کەوتە ھاوینی ئەمساڵ.
