سەرلەبەیانی ئەمڕۆ بافڵ تاڵەبانی سەرۆکی یەکێتی نیشتمانیی کوردستانی عێراق بە سەرۆکایەتی شاندێکی پێکهاتوو لە کاربەدەستان و بەرپرسانی باڵای هەرێمی کوردستان گەیشتە تاران.

 بافڵ تاڵەبانی سەرۆکی یەکێتی نیشتمانیی کوردستانی عێراق کە بە سەرۆکایەتیی شاندێکی باڵا بۆ وتووێژ و ڕاوێژ لەگەڵ بەرپرسانی باڵای ئێران سەردانی تارانی کردووە، پێشنیوەڕۆی ئەمڕۆ لەگەڵ سەید عەباس عەراقچی وەزیری دەرەوەی کۆماری ئیسلامی ئێران کۆبووەوە و وتووێژی کرد. لەم دیدارەدا وەزیری دەرەوەی ئێران بە ئاماژە بە پەیوەندییە زۆر باش و بنیاتنەرەکانی نێوان کۆماری ئیسلامیی ئێران و حکومەت و خەڵکی عێراق و هەرێمی کوردستانی ئێراق، پێیداگرت لەسەر پوتانسییەلی بەربڵاوی ناوچە سنوورییەکانی دوو وڵات و ئاسۆی پەیوەندییەکانی ئێران و عێراق بە تایبەت پێوەندییەکان لەگەڵ هەرێمی کوردستانی ئێراقی بە ڕووناک و هیوابەخش وەسف کرد. عەراقچی هەروەها جەختی کرد لەسەر ئامادەیی کۆماری ئیسلامیی ئێران بۆ پتەوکردن و پەرەپێدانی زیاتری پێوەندییەکانی لەگەڵ هەرێمی کوردستانی عێراق، بەتایبەتی ناوچەی سلێمانی، بە گرنگیدان بە پەرەپێدرانی ئاڵوگۆڕی ئابووری و بازرگانی، ڕێکخستنی هەواهەنگی ئەمنی لە سنوورە هاوبەشەکاندا و بەرەنگاربوونەوەی تیرۆر.
عەراقچی هەروەها بە ئاماژە بە هەندێک جموجۆڵی تیرۆریستی لەسەر سنوورە هاوبەشەکان و هەوڵی دوژمنان بۆ قۆستنەوەی ئەو هەلە ڕەخساوە، پێیداگرت لەسەر پێویستیی بەهێزترکردنی هاوکارییەکان لەپێناو پاراستنی ئاسایشی سنوورە هاوبەشەکان بەگوێرەی لێکگەیشتنی ئەمنی دوولایەنە و ڕاشیگەیاند: دۆستانی کوردمان و هەموو وڵاتانی ناوچەکە دەبێ وریا بن بەرامبەر بە فڕ و فێڵەکانی ئاڵای درۆینە (فاڵس فلەگ) کە بۆ ناکۆکی نانەوە لە نێوان دراوسێکان درووستی دەکەن. سەرۆکی یەکێتیی نیشتمانیی کوردستانی ئێراقیش خۆشحاڵی دەربڕی بەرامبەر بە سەفەری بۆ تاران و دیداری لەگەڵ وەزیری دەرەوەی ئێران . بافڵ تاڵەبانی ئاماژەی بە پەیوەندیی مێژوویی، برایانە و دۆستانەی نێوان خەڵکی ئێران و عێراق و هەرێمی کوردستان کرد و ڕێز و سپاسی دەربڕی بەرامبەر بە پشتیوانی بەردەوامی کۆماری ئیسلامی ئێرانی بۆ حکومەت و گەلی عێراق.  ناوبراو ئێرانی بە بەهێزترین پشتیوانی تاهەتایی گەلی عێراق وەسف کرد و وتی: ئێمە شانازی بە پەیوەندی و دۆستایەتیمان لەگەڵ کۆماری ئیسلامی ئێران دەکەین و پابەندین بە پتەوکردنی هەمەلایەنەی هاوکاری و پەیوەندییەکان لە بوارە جیاجیاکاندا بەتایبەت بواری سیاسی، ئەمنی، ئابووری و بازرگانی. بافڵ تاڵەبانی هەروەها جەختی کرد لەسەر هاوکاری و یەکگرتنی ئێران و عێراق  لەپێناو جێبەجێکردنی ڕێککەوتنی ئەمنیی نێوانیان و داماڵینی چەک لە گروپە تیرۆریستییەکان کە تێکدەری ئاسایشی هەر دوو وڵاتن و راشکاوانە ڕایگەیاند: عێراق و هەرێمی کوردستانی عێراق هەرگیز ڕێگە نادەن خاکی ئەم وڵاتە ببێتە پەناگەیەک بۆ زیانگەیاندن و هەڕەشەکردن لە ئاسایشی وڵاتانی ناوچەکە بەتایبەت کۆماری ئیسلامی ئێران. سەرۆکی یەکیەتیی نیشتمانیی کوردستانی عێراق هەروەها جەختی کرد لەسەر پێویستیی چەکداماڵین لە هەموو گرووپە تیرۆریستییەکان.