سەعد حەدیسی ڕایگەیاند: حکومەتى ناوەند و هەرێم ڕێککەوتوون لەسەر پێکهێنانی هێزێکى هاوبەش بۆ پاراستنى ئاسایشی شەنگال و دەوروبەرى.

بە پێێ هەواڵی کوردپرێس بە گێڕانەوەی NRT ، سەعد حەدیسی وتەبێژى فەرمى ئەنجومەنى وەزیرانى عێراق ڕایگەیاند، لە یەکێک لە بەندەکانى ڕێککەوتنى نێوان عێراق و تورکیا ئاماژە بەوەکراوە، "هەردوو لا ڕێگە نادەن هیچ گروپێکى تیرۆرستى لە سنوورەکەیاندا ببێتە مەترسی بۆ سەر خاکەکەیان".

سەعد حەدیسی وتیشی: لەو پێناوەشدا بەغدا و هەولێر ڕێککەوتوون لەسەر دروستکردنى هێزێکی هاوبەش لە سوپاى عێراق و پێشمەرگە بۆ پاراستنى ئاسایشی شەنگال و دەوروبەرى.

ئەمەش لە کاتێکدایە لە ئێستادا هێزێکى سەربە پارتى کرێکارانى کوردستان پەکەکە لە ناوچەى شەنگالدان و لە ماوەى ڕابردوودا سەرۆکى حکومەتى هەرێم و تورکیا و ئەمەریکاش داوایان کرد ئەو هێزەى پەکەکە لەو ناوچانە بکشێنەوە.

لە بەرامبەردا پەکەکە ڕایگەیاند، ئێمە بە گفتوگۆ کێشەکان چارەسەر دەکەین، بەڵام زمانى هەڕەشە لەکەس قبوڵناکەین و ئامادەى بەربەرچدانەوەى هەرهێرشێکین بکرێتە سەرمان.