مەسعود بارزانی، سەرۆکی هەرێمی کوردستان، کەمێک لەمەوبەر بۆ پێشوازی لە هێنانەوەی تەرمی مام جەلال و بەشداری لە پرسەی ماتەمینی، گەیشتە فڕۆکەخانەی نێودەوڵەتیی سلێمانی.

بڕیارە هەتا 20 خولەکی دیکە تەرمی مام جەلال کە بە فڕۆکەیەکی تایبەت لە بەرلینەوە بەرەو کوردستان بەڕێ کراوە، بگاتەوە سلێمانی و پاش ڕێوڕەسمێکی بەشکۆ، لە گردی دەباشان بە خاک بسپێردرێت.

بۆ پێشوازی لە هێنانەوەی تەرمی مام جەلال سکرتێری گشتیی یەکێتیی نیشتمانیی کوردستان بە سەدان کەسایەتی سیاسی، کۆمالەێەتیی بیانی و ناوخۆیی و جەماوەرێکی فراوان لە هەر چوار پارچەی کوردستان لە سلێمانی ئامادەن.

مام جەلال تاڵەبانی سکرتێری گشتیی یەکێتیی نیشتمانیی کوردستان و سەرۆک کۆماری پێشووی عێراق ڕۆژی سێشەممه لە نەخۆشخانەیەکی ئەڵمانیا کۆچی دوایی کرد.