سەرەڕای ڕاگیرانی خۆپیشاندانی ناڕازیانە لە دوو ستانی هەولێر و دەهۆکی هەرێمی کوردستان، خۆپیشاندانی ناڕازیانەی مامۆستایان و مووچە بگیران لە ژمارێک لە شارەکانی ستانی سلیمنای هێشتایش بەردەوامە.

 بە گوێرەی ڕاپۆرتی کورد پریس، ئەمرۆ چوار شەممە ١٥ خاکە لێوە/ ٤ ئاپریل ، مامۆستایان و مووچە بگیرانی ناڕازیی لە شارەکانی کەلار، قەلا دزێ ، دەربەندیخان و کۆیە، جارێکی تر لە درێژەی ناڕەزایەتی دەربرینەکانی خۆیان دا لە حاند وەرنەگرتنی مووچەی تۆکمەیان هاتنە سەر شەقامەکان.

 مامۆستایانی ناڕازی لەم شارانە ڕایانگەیاند کە تا وەرنەگرتنی تۆکمە و بە کاتی خۆی مووچەکانیان دەستبەرداری خۆپیشاندانی سەرشەقامەکان نابنەوە. ئەمە لە حالێکدایە کە لە دوو پارێزگای دەهووک و هەولێر خۆپیشاندان و مانگرتنی مووچە بگیران و مامۆستایان بە شەرت و مەرچ ڕاگیراوە. ئەم خۆپیشاندانانە لە دە  رۆژی ڕابردوو لە زۆرتری شارەکانی هەرێم دا بەرپا کراوە.

 خۆپیشاندانی حەوتەی ڕابردوو دوای کاردانەوەی هێزی ئاسایشی تووند وتیژی لێکەوتەوە و ژمارێکی زۆر لە خۆپیشاندەران و رۆژنامەوانان و ئەندامانی ژمارێک لە پارتەکانی ئۆپۆزیسیۆن لە درێژەی دا قۆڵبەست کراون.

 خۆپیشاندانی ناڕازییانە و مانگرتنی مووچە بگیران لە هەرێمی کوردستان لە ٣ ساڵی ڕابردوو بۆ دەربڕینی ناڕەزایەتی لە حاند وەرنەگرتنی مووچەیان ، دواکەوتنەوەی درێژخایەن و کەمبوونی بەرچاوی مووچەکان دوا بە دوای بەرنامەی حکوومەت بۆ کەمکردنەوەی خەرجەکان لە ژێر ناوی سیستێمی پاشەکەوت دەستپێکراوە و بە شێوەی بەردەوام درێژەی بووە.