ئەمینداری گشتی وەزارەتی پێشمەرگەی هەرێمی کوردستان بەئاماژە بەوەی کە هەزاران کیلۆمتر لە خاکی عێراق لە خانەقین هەتا شنگال، بەرەوڕووی بۆشایی ئاسایشییە، جەختی کرد لەسەر پێویستیی وتووێژی نێوان هەولێر و بەغدا بۆ چارەسەریی ئەو کێشەیەو گرفتی ناوچە جێ ناکۆکەکان.

بەپێی ڕاپۆری هەواڵدەریی کوردپرێس، "جەببار یاوەر" لە دیمانە لەگەڵ ماڵپەڕی خەنداندا ڕایگەیاند کە حکومەتی ناوەندیی عێراق و هەرێمی کوردستان گەیشتوونەتە ئەو ئەنجامە کە چارەسەریی گرفتی ناوچەکانی هێڵی تەماسی هێزی پێشمەرگەو هێزە عێراقییەکان، پێویستی بەهاواهەنگی و کردەوەی هاوبەشی نێوان دوولایەن هەیە.

ئەمینداری گشتی وەزارەتی پێشمەرگەی هەرێمی کوردستان وتی کە هەزاران کیلۆمتر لەخاکی عێراق لە خانەقین لە رۆژاوای ئەو وڵاتە هەتا شنگال لە رۆژهەڵاتی عێراق و لەناوچەکانی هێڵی تەماسی هێزی پێشمەرگەو هێزە عێراقییەکان، بەرەوڕووی بۆشایی جیددی ئاسایشییەو دەس وپێوەندییەکانی داعش و ترۆریستانی دیکە لەو بۆشاییە ئاسایشییە بۆ ئەنجامدانی هەوڵی ترۆریستی کەڵکیان وەرگرتووە و جم و جۆڵی ترۆریستی و هەڕەشەی ئاسایشی لەو ناوچانەو بەتایبەت پارێزگاکانی کەرکوک، سەلاحەدین و موسڵ، بەشێوەیەکی بەرچاو زیادی کردووەو وامەزەندە دەکرێ کە دوو هەزار ترۆریستی داعشی لەو ناوچانە ئامادەبن.

ناوبراو پێی داگرت کە وەزارەتی پێشمەرگە بۆ چارەسەریی ئەو بۆشاییە ئاسایشییەو هەروەها چارەسەریی گرفتەکانی کەرکووک و ناوچە جێ ناکۆکەکانی دیکەی عێراق، چاوەڕوانی سەفەری شاندێکی حکومەتی عێراقە بۆ هەرێم و وتووێژەکانی هەولێر و بەغدا لەوبارەوە.