بڕیارە ئەمڕۆ شەممە ٢١ی کانوونی یەکەم لە سلێمانی کۆنگرەی چوارەمی یەکێتی نیشتمانی سازبکرێت و کۆنگرە سێ دەستەی سەرۆکایەتی هەڵبژێرێت، ماڵپەڕی "سپی" ناوی ئەو کەسانەی بڵاودەکاتەوە کە بۆ ئەو دەستانە تەوافقی لەسەر کراوە.

 بەپێی ئەو زانیاریانەی دەست سپی کەووتووە، لە کۆنگرەدا ، سێ دەسەڵات هەڵدەبژێردرێت یەکەم: دەسەڵاتی چاودێری‌و رێسادانان بەناوی ئەنجومەنی سەرکردایەتی گشتی. دووەم: دەسەڵاتی جێبەجێکردن کە پێکدێت لەدەستەی سەرۆکایەتی‌و دەستەی جێبەجێکردن. سێیەم: دەسەڵاتی دادی( تەحکیم) کە پێکدێت لەدەستەی پاراستنی قەوارەی ( ی. ن. ک).

 دەربارەی دەسەڵاتی دادی کە زیاتر پێکدێت لە دەستەی پاراستنی قەوارەی یەکێتی، باڵە جیاجیاکانی یەکێتی رێککەوتن لەسەر ئەوەی کە ئەم دەستەیە کۆسرەت رەسوڵ سەرۆکایەتی دەکات و هەریەک لە " عومەر فەتاح و مەلا بەختیار و حاکم قادر و دلێری سەید مەجیدو ئەرسەلان بایز ئەندامی ئەو دەستەیە دەبن.

بەپێی زانیاریەکانی سپی،  لە کۆنگرەدا ئەو ناوانە پێشنیار دەکرێنە سەر کۆنگرەو ئەوانیش بڕیاری لەسەر دەدەن.

 بە پێی راپۆرەکەی  سپی میدیا ، هەروەها  کۆنگرە ١٢١ ئەندام وەک ئەنجومەنی سەرکردایەتی گشتی هەڵدەبژێرێت کە ئەوان بەرپرس دەبن سیاسەتی گشتی و چاودێری و رێسا دادان بۆ یەکێتی، لە نێو ئەم ١٢١ ئەندامە هەڵبژێردراوەدا دەستەیەکی جێبەجێکار هاوشێوەی مەکتەبی سیاسی هەڵدەبژێریت و هەریەک لەوانە بەرپرسی ئۆرگانەکانی یەکێتی دەبن، هاوکات ئەو دەستەیە سەرۆکێک بۆخۆی هەڵدەبژێرێت، تا ئێستا لەنێو باڵەکانی یەکێتی دا بۆ سەرۆکایەتیکردنی ئەو پۆستە ناوی بەرهەم ساڵح دێت.

 کۆنگرەکە داخراو دەبێت و رێگا بە میدیاکان نادرێت رووپێووی کۆنگرە بکەن .

 کۆنگرەکە لە پێشەنگای سلێمانی سازدەکرێت لە رۆژئاوای سلێمانی لە ناوچەی تاسلوجە.