وەزیری دەرەوەی کۆماری ئیسلامیی ئێران کە بە مەبەستی بەشداری لە کۆبوونەوە ئاسایشیەکانی مونیخی ئەڵمان خۆی گەیاندۆتە ئەو شارە بڕیارە ئەمڕۆ هەینی لەگەڵ "مەسعوود بارزانی"ی سەرۆکی هەرێمی کوردستان و وەزیرانی دەرەوەی فەرانسا، بەریتانیا، ڕووسیاو تورکیا چاوپێکەوتن و وتووێژی هەبێ .

بە پێی ڕاپۆرتی هەواڵدەریی ڕادیۆ و تەلەڤزیۆنی ئێران؛ "محەممەد جەواد زەریف" جگە لە وتاردان لە کۆبوونەوەکانی مونیخ و بەشداری لە کۆڕە پسپۆڕییەکاندا، لەگەڵ کاربەدەستانی باڵای وڵاتانی بەشدار لەو کۆبوونەوانەیەش دیدار و وتووێژ دەکات.
سەرانی زیاتر لە ٣٠ وڵات و وەزیرانی دەرەوە و بەرەڤانیی پتر لە ٨٠ وڵات لە ئەمڕۆ / هەینی/ـەوە بۆ ماوەی سێ ڕۆژ لە پەنجا و سێهەمین کۆنفەرانسی ئەمنیی لە مونیخ بەشداری دەکەن و سەبارەت بە هەڵبژێردرانی "دۆناڵد ترەمپ"ی سەرۆک کۆماری نوێی ئەمریکا، داهاتوویی ناتۆ، پێوەندییەکانی ئەورووپا لەگەڵ ڕووسیا و هەروەها قەیرانی سووریا وتووێژ دەکەن و بیر و ڕا دەگۆڕنەوە.