پەرلەمانتارێکی گۆڕان لە پەرلەمانی عێراق رایدەگەیەنێت : فراکسێۆنی گۆڕان پشتیوانی لەو هەڵمەتە راده‌گه‌یه‌نێت که‌ حەیدەر عەبادی بۆ دژایەتی گەندەڵیی دەستیپێکردوەو جەختیش دەکاتەوە کە "پێویستە ئەو هەڵمەتە سەرە زلەکانی گەندەڵیی لەهەرێمی کوردستانیش بگرێتەوە."

 هۆشیار عەبدوڵا ئه‌ندامی‌ په‌رله‌مانی‌ عێراق له‌فراکسیۆنی‌ گۆڕان، لەڕاگەیەندراوێکدا ده‌ڵێت، "ئێمە لەبزوتنەوەی گۆڕان پشتیوانی‌و پاڵپشتی هەر هەنگاوێک دەکەین کە ببێتە هۆی دژایەتی گەندەڵی ڕاوەدونان‌و سزادانی گەندەڵکاران لەدەوڵەتی عێراقدا”.

لە درێژەی لێدوانەکەیدا، هۆشیار عەبدوڵا دەڵێت "پێویستە عەبادی کۆمەڵێک هەنگاو بکاتە ئەولەویەت گرنگترینیان دەستپێکردنی ئەو هەڵمەتەیە لەناو کابینە حکومیەکەی خۆیەوەو ڕەوانەکردنی هەر وەزیریکی بۆ دادگا ئەگەر ئاشکرا بێت تێوەگلاوە لەگەندەڵیی‌و دەستدرێژکردن بۆ ماڵی گشتی.”

لەبەشێکی تری بەیاننامەکه‌ەدا ئەو پەرلەمانتارەی گۆڕان ڕایگەیاندوە، "خەڵک لەهەرێمی کوردستان دەپرسن، ئایا ئەو هەڵمەتی دژایەتی گەندەڵییە گەندەڵکارە گەورەکانی هەرێمیش دەگرێتەوە یاخود عەبادی سیاسەتی لاموبالات‌و گوێپێنەدان بەگەندەڵیەکانیی هەرێم پەیڕەو دەکات‌و ئەو پرۆسەیە تەنها لەحکومەتی فیدڕاڵ ئەنجامدەدرێ‌و حکومەتی هەرێم ناگرێتەوە؟”.

هۆشیار عەبدوڵا پێیوایە پێویستە عەبادی لە بەرگە حیزبی و تایفەیی و نەتەوەیەکەی دەربچێت بەدوای گەندەڵکاریدا بچێت.