شاندێکی پارتی دیمۆکراتی کوردستانی ئێراق لەگەڵ پارتی یەکگرتووی ئیسلامی کوردستان، دیداری کرد .

بەپێی ڕاپۆرتی کورد پرێس،  نێچیروان بارزانی جێگری ڕێبەری پارتی دیمۆکراتی کوردستان و سەرۆک وەزیرانی هەرێمی کوردستانی عێراق ڕۆژی چوارشەممە لە سەرووی شاندێکی  پارتی  لەگەڵ ڕێبەرانی  یەکگرتووی ئیسلامی ، دیدار  و وتووێژی کرد  . 

نێچیروان بارزانی دوای ئەم  چاوپێکەوتنە لە پرێس کۆنفرانسێکی هاوبەش  لەگەڵ سەلاحەدین  بەهائەدین سکرتێری یەکگرتووی ئیسلامی  پێداگری کرد کە  ئامانج لەم دیدارە ئەمەیە   کە پارتەکانی هەرێم بەشێوەی هاوبەش و لە قەواخی شاندێک   بچنە  بەغدا و بە پێی پڕۆژە و گەڵاڵەیەکی هاوبەش، لە وتووێژەکانی پێکهێنانی دەوڵەتی ئێراق بەشداری بکەن و لە پێناو بەدەست هێنانی دەستهاتی زۆرتر بۆ هەرێم هەوڵ بدەن .

ناوبراو هەروەها وتی  کە هیچ لەمپەڕێک لەسەر ڕێی  بەڕێوە چوونی هەڵبژاردنی خولی پێنجەمی پەرلەمانی هەرێم لە ئارادا نییە و سەرباری  هەندێ  باس و ناکۆکی لەنێوان پارتەکانی هەرێمی کوردستان لەسەر بەڕێوە چوونی ئەم هەڵبژاردنە و یان دواخرانی ، هێشتا  هیچ  پارتێک بەشێوەی ڕەسمی وەها داواکارییەکی نەخستوەتە ڕوو  . 

هەروەها سەلاحەدین بەهائەدین سکرتێری یەکگرتووی ئیسلامیش وتی :  پارتەکانی هەرێم بۆ گرتنەبەری هەڵوێستی هاوبەش هەوڵ دەدەن و بەڕای پارتەکەی  پرسی گرینگ لەم ئاستەدا هەڵوێست و ڕوانگەی هاوبەشی هەرێمی کوردستانە  . 

ناوبراو سەبارەت بە بەڕێوەچوونی هەڵبژاردنی پەرلەمانی  هەرێمی کوردستانیش وتی  کە ئەگەر  هەموو پارتەکانی هەرێم سەبارەت بە دواخرانی  بەڕێوەچوونی ڕێککەون، دەبێ داواکارییەکەیان لەمبارەوە  بخەنەبەردەستی دەوڵەتی هەرێم و دەوڵەت لەم بوارەدا  هەوڵ دەدات  .