لە کۆبوونەوەیەکدا وەزارەتی نەوتی عێراق لەگەڵ چەند لایەنیکی جیاوازدا دۆسیەی نەوت و گازی هەرێمی کوردستان و گرێبەستە نەوتییەکانی خستەبەر باس.

لە ڕاگەیەنراوێکدا وەزارەتی نەوتی عێراق ڕایگەیاند: "وەزارەتی نەوت و کۆمپانیای نەوتی نیشتیمانیی عێراق سێیەمین وۆرکشۆپی تایبەت بە تاووتوێکردنی مەلەفی نەوت و غازی هەرێمیان ئەنجام داو تیایدا باسیان لە وەبەرهێنانی نەوت و غازی هەرێم و بەپێی دەقە دەستورییەکان کرد".

ئاماژەی بەوەش کردووە، "کۆبوونەوەکە بەئامادەبوونی ژمارەیەک لە شارەزایانی ناوخۆیی و نێودەوڵەتی لەبواری نەوت و وزە و دەستوور و تیمێکی دیوانی چاودێری دارایی بەڕێوەچووە و تاووتوێی پێداچوونەوە بە گرێبەستە نەوتییەکانی هەرێم کراوە و تێبینی و  بۆچوونی جیاواز لەوبارەیەوە خراونەتەڕوو".