سکرتێری مەکتەبی سیاسی پارتی دیموکراتی کوردستانی عێراق وێڕای پێداگری لەسەر نەیارەتی کردنی ئەم حزبە لە گەڵ پێکهاتنی حکومەتی زۆرینە لە عێراقدا گوتی ، پارتی دیموکرات بەرنامەی خۆی بۆ حکومەتی داهاتووی عێراق داوە بە سەرۆک وەزیرانی راسپێردراو .

بەپێی راپۆرتی کوردپرێس ، فازڵ میرانی دوای چاوپێکەوتنەکانی شاندی عێراقی پێکهاتوو لە رابەرانی پارت و هاوپەیمانیە جیاجیاکانی ئەم وڵاتە بە سەرۆکایەتی عەمار حەکیم ، رایگەیاند ئامانج لە سەردانی ئەم شاندە بۆ هەرێمی کوردستان باشکردنی پێوەندیی لە گەڵ کورد بە تایبەت پارتی و وتووێژ لە بارەی پێکهێنانی حکومەتی داهاتووی عێراق بووە .

سکرتێری مەکتەبی سیاسی پارتی گوتیشی ، پارتی بەرنامە و پلانی خۆی بۆپێکهێنانی حکومەتی نێوی عێراق داوە بە عادل عەبدولمەهدی سەرۆک وەزیرانی راسپێردراو و بەو شاندەشی راگەیاندووە حکومەتی نوێی عێراق نابێ لەسەر بنەمای زۆرینە و کەمینە پێک بێ ، بەڵکوو بنەمای پێکهاتنەکەی  رێککەوتن و هاوسەنگیی نێوان هەموو پارت و باڵەکان و بەشداریی هەموو لایەنەکانی وڵاتە .

میرانی جەختیشی کردەوە هەرێم و عێراق ناتوانن بێ یەکتر بن وپێویستە لە نێوان ئەوان و لە تێکڕای عێراقدا رێککەوتن و هاوسەنگیی و بەشداری راستەقینەی هەموو لایەنەکان لە ئێدارەی کاروبارر دا هەبێ .