کوژرانی 4 کەسی مەدەنی لە بۆردومانەکانی تورکیادا
فڕۆکە جەنگییەکانی دەوڵەتی تورکیا چیای کورتەک و چیای خواکوڕکیان بۆردومان کرد که له ئەنجامدا تا ئێستا 4 کەس کوژراون .
میدیاکانی هەرێمی کوردستان هەواڵیاندا ، ئێوارەی دوێنێ پێنجشەممە بە بیانوی بوونی گەریلاکانی پەکەکە لە سنوری زنجیرە چیای کورتەک، فڕۆکەکانی تورکیا بۆردومانێکی چڕیان دەستپێکرد و بەو هۆیەشەوە دو ئۆتۆمبێلی هاوڵاتیانی سڤیل لە جۆری توێتا هیلۆکس و توێتا لاند کرۆز بەر بۆردومانەکە کەوتن و تیایدا 4کەس گیانیان لەدەستداوە 5ی دیکەش برینداربوون کە هەشت لە قوربانیەکان ئەندامی یەک خێزانن.
هەر بەپێی زانیارییەکان ئێوارەی دوێنێ لە بۆردومانی فرۆکەکانی تورکیا بۆسەر زنجیرە چیای خواکورک، هاوڵاتیەکی سیڤیل برینداربووە و بەر لە گەیاندنی بە نەخۆشخانە گیانی لەدەستداوە.
ئەندامێکی ئەنجومەنی نوێنەران لە لیستی گۆڕان داوا لە سێ سەرۆکایەتییەکەی عێراق دەکات هەڵوێستی جدییان هەبێت بۆ راگرتنی پێشێلکاری و بۆردومانەکانی تورکیا.
کاوە محەمەد لەگەڵ مەحکومکردنی پێشێلکردنی بەردەوامی سەروەری عێراق و ئەو بۆردومانە هەڕەمەکیانە بۆ سەر چەند ناوچەیەکی بەرفراوانی هەرێمی کوردستان بەبێ هیچ بەرەنگارییەکی حکومەتی ناوەندیی و حکومەتی هەرێم، جەختی کردەوە کە پێویستە ئەو دەستوەردانانەی حکومەتی تورکیا کە رۆژانە دەیانکاتە سەر خاکی عێراق رابگیرێن.
