سەرۆکی کۆمسیۆنی ئەورووپا وتی: سەردەمی پشت بەستنی تۆکمە و تەواو بە ئەمریکا کۆتایی هاتووە و ئەورووپا دەبێ بە ئازایەتی و بوێری زیاترەوە پێ بێنێتە ڕێگای بەرەڤانیی هاوبەش.

ئورسولا فۆندێرلاین بە پێداگری لەسەر ئەوەی کە نەزم و دسیپلینی ئاسایشیی ئەورووپا لە هەڵوەشانەوەدایە، خوازیاری  زیاتر بوونی خێرای سەرمایەنانەوە و وەبەرهێنانی بەرەڤانی بوو و ڕاشکاوانەش رایگەیاند: قەیرانی ئاسایشیی هەنووکە ئەوەی دەرخستووە کە بۆچوونەکانی پێشوو سەبارەت بە ئاسایشی ئەورووپا وەهم و خەیاڵ بووە و وڵاتانی ئەم کیشوەرە دەبێ ئامادە بن بۆ بەرپەرچدانەوەی هەر هەڕەشە و مەترسییەکی تازە. فۆندێرلاین هەروەها نیگەرانی دەربڕی لەو کەلێنانەی بۆ دابین کردنی چەک و کەرەستەی جەنگی بۆ ئوکراین درووست بوونە و وتی: خێرا دەبێ ئەو کەلێنانەی پڕ بکرێنەوە و ئەورووپا دەبێ گەرەنتیی ئاسایشیی بەهێزتر بداتە ئوکراین.