وەزیری نەوتی عێراق ڕەتیدەکاتەوە حکومەتی عێراق دانبنێت بەو گرێبەستە نەوتییانەی هەرێمی کوردستان بەبێ گەڕانەوە بۆ ناوەند کردوویەتی ڕاشیگەیاندووە، پێداچوونەوە بۆ ئەو گرێبەستانە دەکەن.

لە کۆبوونەوەی لەگەڵ وەزیری دەرەوەی فەرەنسا و شاندێکی تۆتاڵ ئینێرجیی فەرەنسی، ئیحسان عەبدولجەبار وەزیری نەوتی عێراق ڕایگەیاند، هەرێمی کوردستان تاکلایەنە و بەبێ گەڕانەوە بۆ حکومەتی عێراق گرێبەستە نەوتییەکانی کردووە، بۆیە “داننانێین بەو گرێبەستانەدا”.

جەختیشیکردەوە، دەبێت نەوتی سەرتاسەری وڵات لەڕێگەی خاکی عێراق و حکومەتی عێراقەوە هەناردەی دەرەوە بکرێت، باسی لەوەشکردووە، کە پێداچوونەوە بە سەرجەم گرێبەستەکانی هەرێمی کوردستاندا دەکەن.

لەبارەی کۆبوونەوەکە و نەوتی هەرێمی کوردستانەوە، کۆمپانیای تۆتاڵ ئینێرجی تائێستا هیچ ڕاگەیەندراو و هەڵوێستێکی ئاشکرانەکردووە.

سەبارەت بە هەناردەی نەوتی عێراق وەزیری نەوت وتی، ڕۆژانە 4.4 بۆ 4.5 ملیۆن بەرمیل نەوت بەرهەمدەهێنن، ئامانیشیان ئەوەیە ئاستی بەرهەمهێنان بۆ 8 ملیۆن بەرمیل نەوتی ڕۆژانە بەرزبکەنەوە تا کۆتایی 2027.

ئەمە لەکاتێکدایە مەسرور بارزانی سەرۆکی حکومەتی هەرێمی کوردستان لە کۆڕبەندی ئابوریی داڤۆس ڕایگەیاند، بڕیارەکەی دادگای فیدراڵیی عێراق نادەستوورییە و هەرێمی کوردستان پابەند نابێت پێوەی.