هاوکات لەگەڵ دەسپێبوونی خولیی نوێی کێشەی ڕامیاری نێوان هەرێمی کوردستانی ئێراق و دەوڵەتی فیدڕاڵی ئەو وڵاتە لەسەر هەڵکرانی ئاڵای کوردستانی ئێراق لە سەر بیناو باڵاخانە دەوڵەتییەکانی پارێزگەی کەرکووک، پارتی دیموکراتی کوردستانی ئێراق ناسراو بە پارتی و یەکێتی نیشتمانی کوردستانی ئێراق ناسراو بە یەکێتی سەبارەت بە پێکهێنانی کۆمیتەیەکی هاوبەش بە مەبەستی دیاری کردنی سیستەم و میکانیزم و کاتی بەڕێوەبردنی کۆپرسی گەیشتە تەبای و ڕێککەوتنی کۆتایی .

پارتی دیموکراتی کوردستان (پارتی) و یەکێتی نیشتمانی کوردستانی ئێراق (یەکێتی) ڕۆژی یەکشەممە بە دەرکردنی بەیاننامەیەکی هاوبەش بانگەشەیان کرد هەڵکردنی ئاڵای هەرێمی کوردستان لە سەر بینا و باڵاخانە ئیدارییەکانی پارێزگەی کەرکووکیش کردەوەیەکی یاسایی و بە پێی یاسای بنەڕەتییە.
ئەم بانگەشە و چۆنیەتی شی کردنەوەی بڕگەی ١٤٠ی یاسای بنەرەتیی ئێراق لە کاتێکدا دێتە ئاراوە کە هەر لە بنەڕەتدا پارێزگەی کەرکووک لە ڕیزی پارێزگاکانی پێکهێنەری ناوچەی کوردستانی ئەم وڵاتەدا نییە. تا ئەو کاتەی کە لە چوارچێوی بڕگەی ١٤٠ی یاسای بنەڕەتی کۆپرسی لە کەرکووک بەڕێوە نەچێ و هەموو هۆز و نەتەوەکانی بریتی لە تورکمانەکان، عەرەبەکان لە تەنیشت کوردەکان لەو کۆپرسییەدا بەشداری نەکەن، پارێزگاری کەرکووک و بەرپرسانی هەرێمی کوردستانی ئێراق هیچ مافێکی سیاسییان بۆ بڕیاردانی بەجیا لەم پارێزگەیەدا نییە.
هەنگاوی سەرەڕۆیانەی پارێزگاری کەرکووک لەمەڕ پەسەن کردنی گەڵاڵەی هەڵکرانی ئاڵای کوردستانی ئێراق لە سەر بینا و باڵاخانە دەوڵەتییەکانی پارێزگەی کەرکووک، و داکۆکیی پارتی و یەکێتی لەم کردەوە نائاوەزمەندانەیە، وەک پۆلیسی خراپ دەوریان گێڕا کە لە جیاتی دەستەبەر کردن و دامەزراندنی نەزم و ئاسایش ، لە ڕێگای ئاڵۆزی نانەوە هەنگاو هەڵدەگرێ.
ڕەوشی ئێستای ئێراق بۆ ئەوەی نابێ چووکەترین هەنگاوی هەڵەی تێدا هەڵگیردرێ و هەر چەشنە کردەوەیەکی یەکلایەنە بە مانای یاری کردنی لە زەوینی دوژمنانی ئێراقی یەکپارچە و یەکدەنگە. لە کاتێکدا کە داعش ڕۆژانی کۆتایی ژیانی خۆی لە ئێراق تێدەپەڕێنێ، وشیاری و هاوکاریی گشتی و بە کۆمەڵ، زیاتر لە ڕابردوو بۆ ئێراقێکی پاوەجێ و یەکگرتوو پێویستە، چوونکە هاوکات لەگەڵ تیاچوونی داعش، دوژمنانی ئێراق کەوتنە بیری ڕۆژانی پاش داعش تا مانەوەی خۆیان لەم وڵاتەدا مسۆگر بکەن. دووبەرەکی نانەوە و وەڕێ خستنی شەڕ و کێشەی سیاسی پلان و پیلانگێریی دوژمنانە تا هەلی مانەوەی هەمیشەییان لە ئێراق بۆ بڕەخسێ.
ڕاگەیاندنی بەڕێ کرانی ژمارێکی دیکە هێزی ئەمریکایی بۆ ئێراق هاوکات لەگەڵ لاواز بوون و گەمارۆ درانی داعش لە موسڵ، هیچ مانا و پەیامێکی دیکەی نییە جیا لەوەی کە ئەمریکا دەیهەوێ هەر لە ئێراقدا بمێنێتەوە و جم و  جۆڵی یەکلایەنە و بگرە و بەردەی سیاسی ڕێگا دەکاتەوە بۆ دوژمان بەرەو زەبردان لە ئێراقی سەربەخۆ و یەکپارچە.
ئێراقی ئەمڕۆ خەریکی دەرباز بوون لە هەستیارترین و  پڕمەترسیترین کات و ساتەکانیەتی و هەر چەشنە کردەوەیەکی بەدوور لە بیر و ئاوەز و سوودی گشتی ، بە سوودی دوژمنان دەبێ.
ڕێزدانان بۆ یاسای بنەڕەتی، پەسەن کراوەکانی پەرلەمانی ئێراق و تێگەیشتن لە باروودۆخی سیاسی، ئەم وڵاتە لەهەمبەر پیلانگێریی جۆر بەجۆر دەپارێزێ. پەسەن کراوی پەرلەمانی نوێنەرانی ئێراق لەمەڕ ناچار کردنی پارێزگاریی کەرکووک بەوەی کە تەنیا هەر ئاڵای ئەم وڵاتە لە بینا و باڵاخانە دەوڵەتییەکان هەڵکات، بایەخ دان بە بنەما و پرەنسیبی زۆر گرینگ و بنەڕەتیی  و چارەنووس سازی یەکپارچەیی خاکی ئێراقە.
هەموو گرووپە ئێراقییەکان لە چوارچێوی "ئێراقی یەکگرتوو" سوود و قازانجیان بە نسیب دەبێ و چاوپۆشی لەو مەسەلە گرینگە زەبرێکی قەرەبوو نەکراو لە ئێراق دەات. بۆ وێنە؛ ژمارێک لە گرووپە ئێراقییەکان  وکەسایەتییە سیاسییەکان بە خەیاڵی ئەوەی کە بەو ڕەوشەی تازە کە بێتە ئاراوە ، هیچ سوودی سیاسییان بە نسیب دەبێ، ڕێگایان بەوە دا کە ژوەنی ٢٠١٤ پیکانی داعشی- بەعسی لە ئێراق بە کردەوە جێبەجی بکرێ، بەڵام زۆری پێ نەچوو لە داعش کێشەی بۆ هەموویان ساز کرد و  تا دەروازەکانی هەولێر چووە پێشەوە و پارێزگەی کەرکووکیشی وەبن کاریگەری نا. دووپات بوونەوەی ئەم ئەزموونە، لە ڕێگایەکی دیکەوە بێ گومان هیچ سوودێکی نابێ و ئێراق هەروا ئاڵۆز رادەگرێ و ئەم ڕەوشەیش بێ گومان بە سوودی گەشەپێدران و ئاوەدانی "ئێراقی نوێ" نییە.