باڵوێزی ئێران لە چین: باڵوێزخانەی ئێران و عەرەبستان بەم زووانە دەکرێتەوە
باڵوێزی ئێران لە چین بەیاننامەی هاوبەشی ئێران و عەرەبستانی بە درێژەی ڕێککەوتنی نێوان دوو وڵات بۆ دەستپێکردنەوەی پەیوەندییە دیپلۆماسییەکان و کردنەوەی باڵوێزخانەکانی دوو وڵات لە داهاتوویەکی نزیکدا زانی.
بە پێی ڕاپۆرتی هەواڵدەریی تەسنیم، «محەممەد کەشاوەرزادە» باڵوێزی کۆماری ئیسلامیی ئێران لە چین، سەبارەت بە کۆبوونەوەی وەزیرانی دەرەوەی ئێران و عەرەبستان و دەرکردنی بەیاننامەیەکی هاوبەش لە لایەن دوو وڵاتەوە وتی: پەیوەندییەکانی نێوان دوو وڵات ئاسایی دەبێتەوە و باڵوێزخانەی هەردوو وڵات دەکرێتەوە.
«کەشاوەرزادە» هەروەها سەبارەت بە ڕۆڵی چین لە دەستپێکردنەوەی پەیوەندییە دیپلۆماسییەکانی نێوان ئێران و عەرەبستانیش وتی: چینییەکان هەموو هەوڵێکیان دا بۆ بووژاندنەوەی پەیوەندییەکانی نێوان دوو وڵات.
باڵوێزی ئێران لە چین ڕایگەیاند: چین وەک وڵاتێک بۆ وتووێژی دیپلۆماسی چالاک بووە و قەرەبووی ئەو هەڵانە دەکاتەوە کە ئەمریکا لە ناوچەکەدا کردوویەتی.
«حوسێن ئەمیرعەبدوڵڵاهیان» و «فەیسەڵ بن فەرحان»، وەزیرانی دەرەوەی کۆماری ئیسلامیی ئێران و عەرەبستان، ڕۆژی پێنجشەممە لە پەکین، وێڕای ڕێککەوتن لەسەر کردنەوەی باڵوێزخانەی دوو وڵات لە تاران و ڕیاز، جەختیان لە لابردنی ئاستەنگەکانی بەردەم فراوانکردنی هاوکارییەکانیش کردەوە.
