سەرۆکایەتیی ڕێکخراوەی حەشدی شەعبیی عێراق سەرلەبەیانیی ڕۆژی دووشەممە بە دەرکردنی بەیاننامەیەک باسی ھەڵبژێردرانی «تەحسین مەتەر عەبودی»ی کرد بۆ پۆستی سکرتاریەتی گشتیی ئەم ڕێکخراوەیە.

بە پێی ڕاپۆرتی ئیرنا،«عەبودی» بەرلەمە و لە ڕەوتی ھێرشەکانی داعش لە ساڵی ٢٠١٤ بەرپرسی ھەڵمەتی حەشدی شەعبی لە شەڕ ڕزگار کردنی ناوچە داگیرکراوەکان و بەرپەرچ دانەوەی تاقمی تیرۆریستی داعش بوو.

ناوبراو کۆلیژی شەڕی عێراقی لە ساڵی ١٩٨١ تەواو کردووەو لە زانکۆی بەغداش بڕوانامەی مافناسیی وەرگرتووە.

لە ساڵی ٢٠٠٥ وەک ڕاوێژکاری ئاسایشتی وەزارەتی نێوخۆی عێراق و ھەروەھا وەک ئەندامی کۆمەڵەی نیشتیمانیی عێراق چالاکیی نواندووە.

لەو پۆستانەی دیکەی «عەبودی» ئەندامەتی لە لێژنەی ئاسایشت و بەرەڤانی لە خولی یەکەمی پەرلەمانی عێراق و یاریدەری لێژنەی دادگەریی پەرلەمانی عێراق بووە ھەتا ساڵی ٢٠١٠.