وتەبێژی وەزارەتی دەرەوەی ئێران وتی : کۆبوونەوەی سەرۆکانی ئێران، تورکیا و ڕووسیا لە تاران، دەرفەتێکی شیاو و باشە هەتا دیپلۆماسی و ڕەوتی سیاسی بتوانێ بەسەر شەڕ دا سەرکەوێت و تیرۆریستەکان تەسلیمی خواست و ئیرادەی خەڵکی سوریا بن.

کۆبوونەوەی سەرۆک کۆمارانی ئێران، تورکیا و ڕووسیا سەبارەت بە سوریا سبەی هەینی حەوتەمی سپتەمبەر لە تاران بەڕێوە دەچێ  . 

بەهراام قاسمی  ڕۆژی پێنج شەممە لە یادداشتێک دا لە ڕۆژنامەی ئێران  نووسی : کۆبوونەوەی  سەرۆکانی ئێران، تورکیا و ڕووسیا، درێژەی  وتووێژی  نێوان کاربەدەستانی باڵای ئەم سێ وڵاتە لە پێناو ڕەوتی سیاسی ناسراو بە ڕەوتی ئاستانە بووە و دەرفەتێکی باش بۆ هەماهەنگی و هاوبیروڕایی  بەرامبەر پرسەکانی دوو و چەند لایەنە و گرفتەکانی ناوچەیی و نێودەوڵەتییە.

وتەبێژی  وەزارەتی دەرەوەی  ئێران، ئامانجی سەرەکی کۆبوونەوەی تارانی چارەسەرکرانی بناغەیی و سیاسییانەی  قەیرانی سوریا زانی و وتیشی: هاوکاری ستراتژیکی  نێوان  ئێران، ڕووسیا و تورکیا لە ماوەی سێ ساڵی ڕابردوو، دەورێکی دیاریکەری  لە بەرەنگار بوونەوەی تیرۆریزم  بەتایبەت بەرەنگاربوونەوەی تاقمی تەکفیری  - تیرۆریستیی داعش، دامەزرانی ناوچەکان هێمن و بەدوور لە شەڕ و کێشە و گەڕانەوەی ئاوارەکانی سوری بۆ ماڵەکانیان هەبووە.

قاسمی هەروەها  ئاماژەی کردە زێدەخوازی و ملهوڕییەکانی  ناشیاو و بێ مەنتق و واوەناوچەیی ئەمریکا و وتی :  ئێران، تورکیا وڕوسیا لەبەر قەبووڵ نەکردنی بایکۆتی یەک لایەنە لەلایەن ئەمریکاوە، کەوتوونەتە بن گوشاری جۆربەجۆر و کۆبوونەوەی تاران دەتوانێ  ببێت هۆی هەماهەنگی و هاوبیروڕایی نێوان ئەم سێ وڵاتە بۆ بەرەنگار بوونەوەی بایکۆتی زاڵمانە و هەڕەشەی نادادگەرانە.

وتەبێژی  وەزارەتی دەرەوەی ئێران پێداگری کرد : ئێران، ڕووسیا و تورکیا بەرەوڕووی گرفتی هاوچەشن و هەڕەشەی هاوچەشن لە لایەن  دەسەڵاتدارانی زۆربێژی واوەناوچەیین و بێ گومان  درێژەی  هاوکاری  دوو و سێ لایەنە بووەتە پێویستییەکی بنەڕەتی .