وەزیری دەرەوەی ئێران بە ئاماژە بە ڕووداوەکانی پێش شەڕی ١٢ ڕۆژە وتی: کۆماری ئیسلامیی ئێران لە دانوستانەکاندا، داخوازی نایاسایی لایەنی بەرامبەر سەبارەت بە وەستاندنی پرۆسەی پیتاندنی قبووڵ نەکرد و پاراستنی سەربەرزی و بەرژەوەندیی نیشتمانی لە سەرووی هەموو شتی دیکە دانا.

عەباس عەراقچی وەزیری دەرەوەی ئێران لە وتووێژێکی تەلەفزیۆنیدا وتی: قبوڵکردنی ڕاگرتنی پیتاندن بە مانای سەپێندرانی ویست و ئیرادەی دوژمن بە سەر ئێمە لە ڕێگای شەڕەوە بوو و دەکرا ببێتە مۆدێلێکی مەترسیدار بۆ فشارەکانی دواتری. عەباس عەراقچی وتیشی: کۆماری ئیسلامی ئێران ملی نەدا بە داخوازی نایاسایی پیتاندنی سفر و کە لایەنی بەرامبەریش زانی لە ڕێگای دانوستانەوە ناگاتە ئامانجەکانی، بۆیە بەرەو شەڕ هەنگاوی نا. بەڵام دوای شەڕی ١٢ ڕۆژە، دوژمن لە پلان و پێشبینییەکانیدا بە هەڵەدا چوو، لەبەر ئەوەی کە پێشبینی بەرخۆدان و خۆڕاگریی لەم ئاستەی گەلی ئێرانی نەکردبوو. عەباس عەراقچی جەختی کرد: دوژمن بە خەیاڵی لاواز بوونی ئێران و لەکیسچوونی توانای پێشپێگرانەی وڵاتەکەمان پێی نایە ئەم ڕێگایە، بەڵام دواجار لە بانگەشەی تەسلیمبوونی بێ شەرت و مەرجەوە بەرەو ئاراستەی قبوڵکردنی وتووێژ و واژۆکردنی لێکگەیشتننامە لەگەڵ کۆماری ئیسلامی ئێران ڕۆیشت. وەزیر دەرەوەی ئێران پێیداگرت: سیاسەتی کۆماری ئیسلامیی ئێران تا بووە پێشگری بە شەڕ و بردنی باروودۆخ بەرەولای ڕێکارو ڕێگاچارەی سیاسی و دیپلۆماسییانە بووە، بەڵام دەسپێکردنی شەڕ بڕیاری لایەنی بەرامبەر بوو و ئێران بە خۆڕاگری و پاراستنی باندەست بوونی، ڕێگای نەدا بە هاتنەدی ئامانجەکانی دوژمن.