پەیامی ماڵئاوایی مستەفا کازمی
«مستەفا کازمی» : لە ماوەی دەستەڵاتم دا کەمتەرخەمیم لە ڕاپەڕاندنی ئەرکەکانم و خزمەتکردنی گەلی عێراق نەکردووە.
دوابەدوای بڵاو بوونەوەی دەنگۆی دیاری کرانی کاندیدی تازە بۆ پۆستی سەرۆکایەتیی ئەنجومەنی وەزیرانی عێراق، «مستەفا کازمی» لە پەیامێکدا لە تۆڕی کۆمەڵایەتیی توییتەر کە زیاتر بۆن و بەرامەی پەیامی ماڵئاوایی لێ دەکرێت، ڕایگەیاندووە: ئەو ئەرکەی بۆی دیاریکراوە لە خزمەتکردنی گەلی عێراق ڕایپەڕاندووەو کەمتەرخەمی و سازشی لەسەر بەرژەوەندییە نیشتمانییە باڵاکان نەکردووە.
«مستەفا کازمی» جەختی لەوەش کردووەتەوە کە،بەرژەوەندیی خۆمان پێش بەرژەوەندیی گەلەکەمان نەخستووە و دانابەزیوین ھەتا ئاستی موزایەدە.
کازمی باس لە کارەکانی کابینەکەشی کردووەو وتوویەتی: وڵاتمان گەیاندە هەڵبژاردنێکی ئازادی بێگەرد، سەرەڕای هەموو ئاڵنگاریە ناوخۆیی و دەرەکییەکان بە ئارامی و خۆڕاگرییەکی زۆرەوە بنەماکانی تێپەڕاندنی قەیرانە ئابوری و کۆمەڵایەتی و ئەمنیەکانمان بۆ حکومەتی داهاتوو بونیادناوە.
ئاماژەی بەوەش کردووە کە، ڕووبەڕووی گەندەڵی و گەندەڵکاران بووینەوە، عێراقمان لە بێ دەوڵەتی ڕزگارکردو بەئازایەتیی هێزە ئەمنییەکان و زانیارییە هەواڵگرییەکان شانە نوستووەکانی تیرۆریستانمان لەناوبرد.
سەرۆک وەزیرانی ئێستای عێرڕاق ئینجا ڕوو لە لایەنە سەرکەوتووەکانی هەڵبژاردن ڕایگەیاندووە: ئەمڕۆ بەرپرسن لە پاراستنی ڕێڕەوی نیشتیمانی لە چوارچێوەی کۆتایی پێ هێنانی ئەو بنبەستە سیاسیەی وڵات پێی گەیشتووە، بەرپرسن لە پێکهێنانی حکومەتێک کە بە گوێرەی بەرکەوتەی هەڵبژاردن بێت و نیشتمان بپارێزێت و بەرگری بکات لە یەک پارچەیی خاکەکەی و چارەنووسی.
جێگای ئاماژەیە ھەواڵەکان لە ئێستادا دەربڕی ئەوەن کە «موقتەدا سەدر»ی ڕابەری ڕەوتی سەدر ڕۆژی ھەینی «موحەممەد جەعفەر موحەممەد سەدر» باڵوێزی عێراق لە لەندەنی بۆ پۆستی سەرۆکایەتیی ئەنجومەنی وەزیران کاندید کرد.
