بەردەوامیی یارمەتییەکانی ئێران بۆ جەماوەری ئەفغانستان
تشرینی یه‌که‌م 14, 2021 15:50 Asia/Tehran
لە درێژەی یارمەتییەکانی مرۆڤ دۆستانەی ئێران بۆ جەماوەری ئەفغانستان، یەکەم باری گازی شلەک لە خۆراسانی باشوورییەوە ڕەوانەی ئەو وڵاتە کرا.
بەڕێوەبەری ڕێکخراوەی ھاویاریی شارەدارییەکانی خۆراسانی باشووریی ئێران وتی: ٣٢٢ سیلەندر گاز لە ڕێگای بازاڕی سەر سنووریی یەزدان ڕەوانەی ئەفغانستان کرا.
«مەسعود قولی زادە» وتیشی: ئەم ھەنگاوە ھەتا چارەسەر بوونی گرفتەکانی خەڵکی ئەفغانستان لە بەر کەم بوونی گازی شلەک و ھەڵکشانی نرخەکەی بۆ دوو ھێندە ھەروا بەردەوام دەبێت.
وتیشی: بڕیارە بە شێوەی مانگانە نزیکەی ١٥٠٠ سیلەندر گاز ڕەوانەی وڵاتی ئەفغانستان بکرێت.
خۆراسانی باشووری وەک سێھەمین پارێزگای پان و بەرینی ئێران کە دراوسێی ویلایەتی «فەڕاە»ی ئەفغانستانە ٢٣١ کیلومەتر سنوری ھاوبەشی لەگەڵ ئەو وڵاتەدا ھەیە.
