دامەزراندنی نوسینگەی نوێنەرایەتیی وەزارەتی نەوتی ئێران لە عێراق
نوێنەرایەتیی وەزارەتی نەوتی کۆماری ئیسلامیی ئێران لە بەغدای پایتەختی عێراق کرایەوە.
بە پێی ڕاپۆرتی ئیرنا، «سەیید عەباس بەهەشتی» نوێنەری وەزارەتی نەوتی ئێران بۆ کاروباری عێراق ڕایگەیاند: ئەم نووسینگەیە بە مەبەستی بەرزکردنەوەی ئاستی هاوکاری و یەک ھێزمەند کردن، بە تایبەت جێبەجێکردنی پڕۆژەی هاوبەشی نێوان هەردوو وڵاتی دۆست و برا لەبواری نەوت و گازو وزە لە شاری بەغدا کرایەوە.
بەهەشتی ئاماژەی بەوەشکرد، نوسینگەی نوێنەرایەتیی وەزارەتی نەوتی ئێران وەک بەڕێوەبەرایەتیی نووسینگەکانی عێراق کاردەکات و نووسینگەی لاوەکیی دیکەش لە سونگەی پراکتیکییەوە لە بەسرە و هەرێمی کوردستانی عێراق خەریکی دامەزرانن.
عێراق لە نێو وڵاتانی عەرەبی ڕۆژئاوای ئاسیا، زۆرترین پەیوەندیی فەرهەنگی و ئایینی لەگەڵ ئێران هەیە.
بوونی درێژترین سنوور لە نێوان دراوسێکان واتە (نزیکەی 1258 کم سنووری وشکانی و 351 کم سنووری ئاوی)، پەیوەندی ڕەگەزی، مێژوویی، زمانەوانی، هاوبەشیی ئایینی و بوونی هەڕەشە و بەرژەوەندیی هاوبەشی ئەمنی و ئابووری لە ڕیزی ئەو خاڵە گرنگانەی پەیوەندییەکانی نێوان ئێران وعێراق دێنە ئەژمار.
