ئەحمەد مەسعود: ئەگەر دانوستانەکان شکست بێنێ ئامادەی بەرەڤانین
«ئەحمەد مەسعود» کوڕی پاڵەوانی نیشتیمانیی ئەفغانستان جەختی کرد: ئەگەر بێتو دانوستانەکانمان لەگەڵ تالیبان شکست بێنێ بۆ بەرنگاری و شەڕی دژی ئەم تاقمە ئامادەین.
بە پێی ڕاپۆرتی ھەواڵدەریی ئاوا، دوای ئەوەی کە تاقمی تالیبان ھێزەکانی لە چەند لاوە لە بەردەم دەروازەکانی «پەنجشیر» لە باکووری ئەفغانستان جێگیر کرد، «ئەحمەد مەسعود» سەرکردەی ھێزەکانی دژی تالیبان وتوویەتی: «پەنجشیر ڕادەستی تالیبان ناکات.
کوڕەکەی «ئەحمەد شا مەسعود» جەختی لەوە کردووەتەوە کە، تاکە ڕێگاچارەی ئەفغانستان، وتووێژە، بەڵام ئەگەر بێتو دانوستانەکان شکست بێنێ، ئەوسا ئامادەی شەڕی دژی تالیبانین.
ئەمەو لە لایەکی دیکەوە، تالیبان باسی گەمارۆدانی «پەنجشیر»ی کردووەو دەڵێت: ھێزەکانیان خەریکی خۆسازدانن.
ویلایەتی «پەنجشیر» لە باکووری ڕۆژھەڵاتی ئەفغانستان دا ھەڵکەوتووەو حەشیمەتەکەی بە گوێرەی سەرژمێریەک کە لە ساڵی ڕابردوودا کراوە ١٧٣٠٠٠کەس بووەو ناوەندەکەی شاری «بازاراک»ـە و خەڵکەکەی بە زمانی فارسی قسە دەکەن و زۆربەشیان لە ھۆزی تاجیکن.
«پخنجشیر»تەنیا ویلایەتی ئەفغانستانە کە دوای دەستەڵات گرتنی تالیبان داگیر نەکراوە.
