روسیا و ئوکراین لەسەر ئاگربەسی کاتیی رێککەوتن
وەزاڕەتی بەرگریی روسیا ڕایگەیاند بۆکردنەوەی کۆریدۆری مرۆیی و چوونە دەرەوەی خەڵکی سڤیل لەگەڵ لایەنی ئۆکراینی ڕێککەوتووین.
وەزارەتی بەرگری ڕووسیا لە دەیەمین ڕۆژی شەڕی ئوکراین رایگەیاند کە سەبارەت بە کۆریدۆری مرۆڤدۆستانە و ڕێگاکانی چوونە دەرەوەی خەڵکی سڤیل لەگەڵ لایەنی ئوکراینی ڕێککەوتن کراوە و ڕێگاکانی مرۆڤدۆستانە بۆ چوونە دەرەوەی خەڵکی سڤیل لە ماریۆپۆل و ولنۆڤاخا دەکرێتەوە.
ڕۆژی ڕابردوو وتەبێژی کۆشکی کرملین لە لێدوانێک دا بە ئاماژە بە ئۆپراسیۆنی سەربازیی ڕووسەکان لە ئۆکراین وتی: پوتین لە گفتوگۆ لەگەڵ لۆکاشنکۆ جەختی کرد ئۆپراسیۆنی سەربازیی بە پێی بەرنامەی دیاریکراو درێژەی هەیە و بەتەواوەتی بەڕێوە دەچێت.
ناوبراو گوتیشی : ئاسۆی دانوستانەکانی ڕووسیا و ئۆکراین پێوەندی بە کاردانەوەی کیێف بە هەڵوێستەکانی مسکۆوە هەیە. ئەو دانوستانانە ئەبێ لە بێدەنگی و بە دوور لە هەرای مێدیایی ئەنجام بدرێت.
وەزارەتی بەرگری ڕووسیا ڕایگەیاند کە لە ئەمڕۆ کاتژمێر 10 ی بەیانییەوە، تەقە کردن ڕادەگیردرێت و ڕێگاکانی مرۆڤدۆستانە بۆ چوونە دەرەوەی خەڵکی سڤیل لە ماریوپۆل و ولنۆواخا دەکرێتەوە.
