ماریا زاخارۆڤا: وەزیری دەرەوەی ئەمریکا پاڵنەری تێکدانی لە نۆرد ستریم ئاشکرا کرد
وتەبێژی وەزارەتی دەرەوەی ڕووسیا بە شێوەیەکی ناڕاستەوخۆ حکومەتی ئەمریکای وەک هۆکاری تێکدانی هێڵەکانی گواستنەوەی گازی نۆرد ستریم دەستنیشان کرد.
بەپێی زانیارییەکانی "ریانۆڤستی"، ماریا زاخارۆڤا، وتەبێژی وەزارەتی دەرەوەی ڕووسیا (دووشەممە) ڕایگەیاند، کە ئەنتۆنی بلینکن، وەزیری دەرەوەی ئەمریکا لە لێدوانەکانی دا سەبارەت بەم ڕووداوە بە شێوەیەکی ناڕاستەوخۆ دانی بە تێکدانی ناوە لە نۆرد ستریمدا.
لە درێژەی قسەکانیدا ئاماژەی بەوەشکردووە، "بلینکن بە ئاشکرا و بەبێ بچووکترین گومانی لەبارەی پاڵنەرەکانی ئەمریکا و هاوپەیمانەکانی لە ناتۆ بۆ لەناوبردنی بۆرییەکانی گواستنەوەی گازی نۆرد ستریم ١ و نۆرد ستریم ٢ قسەی کرد".
ئەم دیپلۆماتە ڕووسییە وەبیری هێنایەوە کە وەزیری دەرەوەی ئەمریکا لەگەڵ هاوشانە کەنەدییەکەی، میلانیا جۆلی، سەبارەت بە زیادبوونی بەرهەمهێنانی "گازی شل" لە ئەمریکا قسەی کردووە و ئیدیعای کرد کە ئێستا واشنتۆن بووەتە دابینکەری سەرەکی گاز بۆ ئەوروپا.
