ئەمریکا دەبێ کۆتایی بێنێ بە دەستوەردان لە کاروباری نێوخۆی لوبنان
سەرۆکی ناوەندی نیشتمانی لەپارێزگای ئەلشمالی لوبنان وتی: حکومەتی ئەمریکا کە لایەنگری رژیمی ئیسرائیل و زایۆنیزمی جیهانییە، قەت بۆی نییە چارەسەریی کێشەکان بکاو دانوستان ئەنجام بدات لەسەر پرسی سنووری لوبنان لەگەڵ ئەو رژیمە داگیرکەرە.
ئەم بەینە ئاڤیگدۆر لیبرمەن وەزیری جەنگی رژیمی زایۆنیستی ئیدیعای کرد، بلوکی نۆهەمی نەوت و گازی لوبنان لە دەریای ناوەڕاست، هی ئەو رژیمەیە کە نەیارەتی بەرفراوانی بەرپرسانی لوبنانی بەدواوە بووە.
دوابەدوای ناکۆکی نێوان دوو لایەن، لەپەراوێزی دیداری رۆژی پێنج شەممەی ڕێکس تیلرسۆن وەزیری دەرەوەی ئەمریکا لەگەڵ بەرپرسانی لوبنانی لە بەیرووت، ناوبراو پێشنیارێکی بۆ چارەسەریی ئەو ناکۆکییە، خستەڕوو.
بەپێی ئەو گەڵاڵەیە، ئەمریکا پێشنیاری کرد، سەتا شەستی سەرچاوە نەوتییەکان لە بلوکی نۆهەم لەدەست لوبنان و سەتا چلی دیکەشی لەدەست رژیمی زایۆنیدا بێت کە لەگەڵ نەیارەتی شێلگیرانەی سەرۆکی پەرلەمانی لوبنان بەرەوڕوو بووە.
بەپێی ڕاپۆری ماڵپەڕی ئەلعەهدی لوبنان، کەمال ئەلخەیر، سەرۆکی ناوەندی نیشتمانی لە پارێزگای ئەلشمالی لوبنان بەئاماژە بە داکۆکیی ئەمریکا لە رژیمی زایۆنیستی کە جگە لە داگیرکردنی فەلەستین، خوازیاری داگیرکردنی بەشگەلێکی سووریاو لوبنانیشە، وتی: ئەمریکا کە بەشداری هەموو شەڕ و تێکهەڵچوونەکانی جیهانە، لەحاڵێکدا بانگەشەی چارسەریی کێشەی سنوورەکانی لوبنان لەگەڵ فەلەستینی داگیرکراو دەکا کە ئەو سنوورانە لەڕابردوودا دیاری کراون و هەموو کۆڕ و نێوەندە نێودەوڵەتییەکانیش بەڕەسمییەتیان ناسیون و رژیمی ئیسرائیل لە دەسدرێژکارییەکی ئاشکرادا، سەروەریی لوبنان دەبەزێنێ.
سەرۆکی ناوەندی نیشتمانی لە پارێزگای ئەلشمالی لوبنان وێڕای ئەوەی سەفەری رێکس تیلرسۆن وەزیری دەرەوەی ئەمریکا بۆ بەیرووتی بەلاوە سەیر بوو ، وتی: دەوڵەتی ئەمریکا دەبێ لەیەکەم هەنگاودا گرینگی بە ژیانی خەڵکی وڵاتەکەی بدات و خۆببوارێ لە دەسوەردان لەکاروباری ناوخۆی لوبنان.
کەماڵ ئەلخەیر ، "یەکگرتوویی حکومەت و گەلی لوبنان" و"سێ گۆشەی زێڕینی سوپا، گەل و موقاوەمە"ی بە دوو بنەمای گرینگی ئەو وڵاتە زانی و وتی: ئەمڕۆ یەکپارچەیی لە لوبنان و بەرەنگاربوونەوەی ئیسرائیل لەسای ئەو بنەمایانە ، پێکهاتووە.
هەرلەوبارەوە، سەیید حەسەن نەسروڵڵا سکرتێری گشتیی حیزبوڵڵای لوبنان دوێنێ هەینیی جەختی کرد؛ ئەمریکا ناوبژیوانێکی ڕاستبێژ نییەو هەردەم پارێزەری بەرژەوەندییەکانی ئیسرائیل بووە.
