وتەبێژی رێکخراوەی مافی مرۆڤی عەفرین رایگەیاند، لە ماوەی دوو رۆژی رابردوو چەکدارانی (فرقەی حەمزە)ی نزیک لە تورکیا لە ناحیەی ماباتا 900 دار زەیتونیان بریوەتەوە و دوای "داگیرکردنی ئەو شارە تا ئێستا زیاتر لە 20 ھەزار زەیتون دەرھێنراون".

ئیبراھیم شێخۆ، وتەبێژی رێکخراوەی مافی مرۆڤی عەفرین بە  میدیای وێستگەنیوز-ی راگەیاند، " ئەو گروپە چەکدارانەی کە تورکیا پشتیوانییان دەکات لە عەفرین بەردەوامن لە تاڵانکردن و دزینی سەر و ماڵی ھاوڵاتیان و ئەشکەنجە و رفاندنیان".

وتیشی، " لە ماوەی دوو رۆژی رابردوو چەکدارانی سەر بە تورکیا 900 دار زەیتونی ھاوڵاتیانی کورد-یان لە ناحیەی ماباتا بڕیوەتەوە". 

ئاماژە بەوەشکرد، " لە مانگی ئازاری ساڵی 2018 عەفرین لە لایەن سوپای تورکیا و چەکدارەکانی داگیرکراوە و تا ئێستا زیاتر لە 300 ھەزار زەیتونیان بڕیوەتەوە و 20 ھەزار دار زەیتونیش دەرھێنراون و زیاتر لە 15 ھەزار داریش سوتێنراون".