ئاژانسی هەواڵدەریی رووسیا ئەلیەوم بڵاویکردەوە، دوای تەقینەوەی بۆمبێک لە پارێزگای لازقیەی سووریا، کەسێک کوژراوە و حەوت کەسی دیکەش برینداربوون.

بەپێی راپۆرتی روسیا ئەلیوم رۆژی هەینی، تەقینەوەی بۆمبێکی چێندراو لە شاری جەبەلەی سەر بە پارێزگای لازقیە کە دەکەوێتە باکووری رۆژئاوای سووریاوە، کوژرانی منداڵێکی تەمەن ١٣ ساڵ و بریندار بوونی ٧ کەسی دیکەشی لێ کەوتەوە.

هاوکات میدیا خۆجێییەکان وتوویانە، ئەم بۆمبایە لە نزیک سەبەتەی زبڵ دانراوە، کە زیانی بە چەند ئۆتۆمبێلێکیش گەیاندووە.

بەپێی ڕاپۆرتەکە، تا ئێستا هیچ وردەکارییەکی دیکە لەبارەی ئەم ڕووداوەوە بڵاونەکراوەتەوە لێکۆڵینەوە بۆ زانینی وردەکارییەکانی ئەم ڕووداوە بەردەوامە.