دیمەشق: حکومەتی ئەمریکا دەبێت قەرەبووی گەلی سوریا بکاتەوە
وەزارەتی دەرەوەی سوریا لە کاردانەوەیەک دا بەرامبەر بە تاڵان کرانی نەوتی ئەم وڵاتە لە لایەن سوپای ئەمریکاوە داوای لە حکومەتی واشنتۆن کرد کە ئەو کارە بوەستێنێت و قەرەبووی گەلی سوریا بکاتەوە.
بەگوێرەی ئاژانسی هەواڵدەریی تەسنیم، وەزارەتی دەرەوەی سوریا لە بەیاننامەیەکدا ڕایگەیاندووە، هێزە داگیرکەرەکانی ئەمریکا بەردەوامن لە تاڵانکردنی نەوت و سامانە سروشتییەکانی دیکەی سوریا لە ڕێگەی باکوری عێراقەوە بۆ تورکیا، دیارە ئەمەش لەگەڵ یاسای مافی مرۆڤی نەتەوە یەکگرتووەکان ناگونجێ و دەبێتە هۆی هەژار بوونی گەلی سوریاو درێژە خایاندنی کێشەکانیان.
لەم بەیاننامەیەدا وەزارەتی دەرەوەی سوریا ئەم کارەی ئەمریکای شەرمەزار کرد و داوای لە حکومەتی ئەمریکا کرد کە ئەو کارە ڕابگرێت و قەرەبووی گەلی سوریا بکاتەوە. چونکە ئەمریکا مافی دزی و تاڵان و بڕۆی لە سوریادا نییە.
لەم بەیاننامەیەدا وەزارەتی دەرەوەی سوریا هەروەها داوای لە ئەمریکا کرد کە واز لە پشتیوانیکردنی گروپە جوداخوازە کوردییەکان بهێنێت و لە زووترین کاتدا سوریا بەجێ بهێڵێت.
ئاژانسی هەواڵدەریی فەرمیی سوریا (سانا) ڕۆژی ڕابردوو لە ڕاپۆرتێکدا نووسی: لەشکریانی ئەمریکیی سەقامگرتووی سوریا ھەر ئەمڕۆ دەیان تانکەری پڕلە نەوتیان لە ناوچەی ئەلجەزیرەی سوریا بەرەو خاکی عێراق گواستووەتەوە.
