زەریف : ئێران و عێراق دەبێ لە بەرامبەر ھەڕەشە تیرۆریستیەکاندا ئامادە بن
وەزیری دەرەوەی ئێران بە ئاماژە بە مەترسیی تیرۆریسم بۆناوچەی رۆژاوای ئاسیا جەختی کردەوە ، ئێران و عێراق دەبێ ھەمیشە لە بەرامبەر ھەڕەشە ئاسایشیەکانی گروپە تیرۆریستیەکان لەوان داعش وریایی و ئامادەییان ھەبێ .
محەمەد جەواد زەریف وەزیری دەرەوەی ئێران کە سەردانی بەغدای کردووە ، ئەمڕۆ یەکشەممە لە پرێس کۆنفڕانسێکدا لە گەڵ فواد حسێن وەزیری دەرەوەی عێراق گوتی ، بەداخەوە ھەنگاوی تیرۆریستیی ئەمریکا لە شەھیدکردنی سەرداری سپەھبود قاسم سلێمانی و ئەبومەھدی موھەندیس و ھاوڕێکانیان خەسارێکی گەورە بوو بۆ بەرەنگاربوونەوەی تیرۆریسم لە ناوچەکەدا .
زەریف وتیشی ، ئێران و عێراق بۆ بەدواداچوون و دادگایی کردنی ئەنجامدەرانی ئەم تاوانکاریە لە گەڵ یەکتردا ھاریکاری دەکەن .
وەزیری دەرەوەی ئێران بە پێداگری لەسەر ئەوەی کە ئێران و عێراق لە بەرامبەر تیرۆریسمدا ڕاوەستاون گوتی ، پێوەندیەکانی ئێران عێراق بە خوێنی لاوانی دوو وڵات لە بەرەنگاربوونەوەی داعش پاوەجێ بووە و ئەم پێوەندیانە ھەرگیز بە ھیچ لەونێک لەبەین ناچێت .
زەریف گوتیشی : بۆ کۆماری ئیسلامیی ئێران گرنگە سەروەریی نیشتمانیی و یەکپارچەیی خاک و سەربەستیی عێراق بکەوێتە بەر دەستدرێژیی دەرەکی .
وەزیری دەرەوەی ئێران ھەروەھا بە پێداگری لەسەر پەرەی ھاریکاریی ئابووریی ئێران و بەغدا گوتی ، پتانسێلی ئابووریی ئێران وعێراق دەتوانێ بۆپێشکەوتنی ھاوبەشی دوو نەتەوە دەکاربێت .
قواد حسێن وەزیری دەرەوەی عێراقیش لەم پرێس کۆنفڕانسەدا بە ئاماژە بەوەی کە بەغدا بەدوای پێوەندیی ھاوسەنگ لە گەڵ وڵاتانی دراوسێدایە گوتی ، بەردەوامیی پێوەندیی بازرگانیی نێوان ئێران و عێراق سەرباری بڵاوبوونەوەی کۆرۆنا پێویستە .
فواد حسێن ھەروەھا جەختی کردەوە لەسەر بەرژەوەندیی ناوچەیی و دەستوەرنەدانی وڵاتان لە کاروباری یەکتر و پێویستیی بەدوور ڕاگرتنی ناوچە لە کێشە و بارگرژیی .
