کاردانەوەی ئێران بە بڕیارنامەی کۆمەڵی گشتیی رێکخراوی نەتەوەکان لە بارەی ھۆلۆکاست
وەزارەتی دەرەوەی ئێران شەوی رابردوو لە بەیاننامەیەک دا وێڕای جیاکردنەوەی ئێران لە ئەسڵ و بڕگەکانی بڕیارنامەی ھۆلۆکاست لە کۆمەڵی گشتیی ، ئەم ھەنگاوەی وەک قۆستنەوەی میکانیزمە نێودەوڵەتیەکان لە لایەن رژێمی زایۆنی بۆ پەردەپۆشکردنی تاوانکاریەکانی زانی و ڕەتی کردەوە .
بە پێی راپۆرتی ھەواڵدەریی فارس ، لەم بەیاننامەیەدا ھاتووە : ئەم کارەی رژێمی زایۆنی ھەوڵێکی دیکەیە بۆ کەڵکی خراپ وەرگرتن لە میکانیزمەکانی رێکخراوی نەتەوەکان بۆ پەردەپۆشکردنی تاوانکاریەکانی رۆژانەی ئەم رژێمە کە بە داخەوە ئەم رۆژانە داکۆکیشی لەپشتە .
بەیاننامەکە ھەروەھا دەڵێ : کۆماری ئیسلامیی ئێران ھەمیشە جینۆسایدی لە ھەر بارودۆخێک دا مەحکوم و بە پاساوھەڵنەگر زانیوە و لەبەر ئەوە بە درێژایی شەڕی دوھەمی جیھانیی ، ئێران میوانداری ئاوارەکانی ئەم شەڕە لە ھەندێ وڵاتی ئەوروپایی بووە ، لە ھەمان کات دا رژێمی زایۆنی ھەمیشە ھەوڵیداوە قوربانیانی شەڕی دوھەمی جیھانی و جولەکەکان وەک پاساوێک بۆ ھەنگاوە بێشەرمانە و دەستدرێژکاریەکانی خۆی دەکار بێنێ .
لە بەیاننامەکەی ئێران دا ھاتووە : کۆماری ئیسلامیی ئێران بۆ جارێکی دیکە جەخت دەکاتەوە پێشگری کردن لە دوپاتبوونەوەی کارەساتە مێژووییەکان پێوستیی بە توێژینەوەی مێژوویی ھەیە کە دەبێ بێ داوەری و پێشداوەریی سیاسی ئەنجام بدرێت .
