نوێنەرێکی سوننەی مەجلیسی ئێران: ئیمام خومەینی(رە) فەلەستینی کرد بە پرسی جیھانی ئیسلام
ئەندامێکی فراکسیۆنی ئەھلی سوننەی مەجلیسی شورای ئیسلامیی ئێران وتی: ڕوانگەی ئیمام خومەینی (رە) بەرامبەر بە پرسی قودس، کێشەی فەلەستینی کرد بە پرسی تەواوی جیھانی ئیسلام .
«جەلیل ڕەحیمیی جیھان ئابادی» ئەندامی فراکسیۆنی ئەھلی سوننەی مەجلیسی شورای ئیسلامیی ئێران وتی: ڕوانگەو دەستپێشخەریی جۆربەجۆر لە بارەی سەندرانی مافی جەماوەری فەلەستین ھاتووەتە ئاراوە، بەڵام ھیچیان وەک دەستپێشخەرییەکەی ئیمام خومەینی نەبوون و لە کاتی سەرکەوتنی شۆرشی ئیسلامییەوە، ڕوانگەی ئیمام خومەینی (رە) بەرامبەر بە پرسی قودس، بووە ھۆی ئەوەی کە کێشەی فەلەستینی ببێ بە پرسی تەواوی جیھانی ئیسلام.
ئەم ئەندامەی فراکسیۆنی ئەھلی سوننەی مەجلیسی شورای ئیسلامیی ئێران وتیشی: ڕۆژی قودس ھەلێکی ڕەخساندووە بۆ ئەوەی ھەموو ساڵێک کۆمەڵێکی زۆر لە خەڵکانی دنیا بۆ بەرەڤانی کردن لە مافی فەلەستینییەکان و ئیدانەکردنی داگیرکرانی سەرزەوینی فەلەستین بەشداریی ڕێپێوانێک بکەن کە دەربڕی گرینگایەتیی ئەم ھەنگاوە سیاسی و مێژووییەی حەزرەتی ئیمام خومەینی (رە)ـە.
«جەلیل ڕەحیمیی جیھان ئابادی» تیشکی خستە سەر ئەمەش کە ناودێر کرانی ڕۆژی قودس نیشانەی ڕوانگەی ئیلاھیانەو ئیسلامیی حەزرەتی ئیمام خومەینی(رە) یەو وتیشی: ئەمڕۆ ڕژێمی زایونی لە دۆخێکی زەبرھەڵگردایە، ئەوانە کاتی خۆی بانگەشەی لە نیلەوە ھەتا فۆراتیان دەکرد، کەچی ئێستاکە سەرکردەکانی ئەم ڕژێمە بەس بەنیازی پاراستنی ئەو ناوچانەن کە داگیریان کردووە.
ئەم ئەندامەی فراکسیۆنی ئەھلی سوننەی مەجلیسی شورای ئیسلامیی ئێران وتیشی: زایونییەکان بۆ بەڕێوەبردنی سەرزەوییە داگیرکراوەکان توشی کێشەن و ڕەوتی کۆچکردنی بە پێچەوانەو دابەزینی ئاستی حەشیمەتی جولەکەکان لەم ناوچانەدا دەستی پێکراوە، چونکو گەلێک لە زایونییەکان ھیچ داھاتوویەک بۆ خۆیان نابینن و تەریک خراونەتەوە.
