ئاژانسی میدل ئیست نیوز بڵاویکردەوە، سبەی یەکشەممە ( 26ی حوزەیران) مستەفا کازمی، سەرۆکوەزیرانی عێراق گەشتی تاران دەکات و لەگەڵ بەرپرسانی ئێران کۆدەبێتەوە.

ئەمڕۆ شەممە، ماڵپەڕی "میدل ئیست نیوز" لە زاری سەرچاوەیەکی ئاگادارەوە ڕایگەیاند: "مستەفا کازمی" بە گەشتێکی ڕانەگەیەندراو دەگاتە تاران.

بە وتەی ئەم سەرچاوەیە، تا ئێستا وردەکاریی ماوەی گەشتەکەی مستەفا کازمی و کارنامەی ئەم گەشتە ڕانەگەیەندراوە.

هەواڵە تایبەتەکەی ماڵپەڕی عێراقیی "میدڵ ئیست نیوز" لە چوارچێوەی ئەم گەشتەدا لە کاتێک دا بڵاوکرایەوە کە لە چەند هەفتەی ڕابردوودا بەرپرسانی بەغدا و تاران باسیان لە پرسگەلێکی وەک هاتنی زیارەتکارانی ئەربەعین و پرسی  دانەوەی پێدانی قەرزی وەزارەتی کارەبای عێراق بۆ ئێران  کردبوو.

لەلایەکی دیکەوە، ئەمڕۆ شەممە وەزارەتی کارەبای عێراق ڕایگەیاند، قەرزە دواکەوتووەکانی ئێران بۆ هاوردەکردنی وزە دراوەتەوە و بەغداش ڕاوێژکاری دەکات بۆ زیادکردنی هاوردەی گاز لە ئێرانەوە.